Matiu 1

1De'e mi'i daritakáná Iesu, pemule'ána Datu Daudi', pemule'ána Burahima. Mantepu'u hangko i Burahima hawe' i Datu Daudi', hanga'ra' toioruna Iesu, de'emohe'e: 2Burahima momuleáka Isaki'; Isaki' momuleáka Iako; Iako momuleáka Iudá hai halalunahe'; 3Iudá momuleáka Peresi hai Sera (inára' rahanga' Tama); Peresi momuleáka Hesero; Hesero momuleáka Rama; 4Rama momuleáka Aminada'; Aminada' momuleáka Nahaso; Nahaso momuleáka Salomo; 5Salomo momuleáka Boasi (inána rahanga' Raha); Boasi momuleáka Obe' (inána rahanga' Ruti); Obe' momuleáka Isai; 6hai Isai momuleáka Datu Daudi'. Mantepu'u hangko i Datu Daudi' hawe' i karatawaniára' toIahudi' lao i kótá Bábeli, hanga'ra' to toiorura' Iesu, de'emohe'e: Daudi' momuleáka Salomo (inána Salomo rahanga' Batseba, bemba'na Uria); 7Salomo momuleáka Rehabea; Rehabea momuleáka Abia; Abia momuleáka Asa; 8Asa momuleáka Iosapa'; Iosapa' momuleáka Iora; Iora momuleáka Usia; 9Usia momuleáka Iota; Iota momuleáka Ahasi; Ahasi momuleáka Sikia; 10Sikia momuleáka Manase; Manase momuleáka Amo; Amo momuleáka Iosia; 11Iosia momuleáka Iekonia hai halalunahe'. I tempó iti toIahudi' ratawani ra'ánti lao i tampo' Bábeli. 12Mantepu'u hangko i karatáwánira' toIahudi' i Bábeli hawe' i karapoánákana Iesu, hanga'ra' toioruna Iesu, de'emohe'e: Iekonia momuleáka Sealatie; Sealatie momuleáka Serubabe; 13Serubabe momuleáka Abihu'; Abihu' momuleáka Eliaki; Eliaki momuleáka Asó; 14Asó momuleáka Sado'; Sado' momuleáka Akimi; Akimi momuleáka Eliu'; 15Eliu' momuleáka Eleásá; Eleásá momuleáka Mata; Mata momuleáka Iako; 16hai Iako momuleáka Iusupu to mewali' toámána Maria. Maria iti to moánáka Iesu to rauli' Kerisitu. 17Mewali', mantepu'u hangko i Burahima hawe' i Daudi', kahanda'ra' to momuleáka Iesu hampulo' hai iba lápina. Mantepu'u hangko i Daudi' hawe' i karatáwánira' toIahudi' lao i tampo' Bábeli, hampulo' wo'o hai iba lápina, hane'i mantepu'u hangko i karatáwánira' toIahudi' i Bábeli hawe' i karapoánákana Kerisitu, hampulo' wo'o hai iba lápina. 18De'e mi'i daritakáná karapoánákana Iesu Kerisitu, Datu Topehómpó'. Tempóna Maria ináNa nakaróhói ngkórá' hai hadua tobaleilo to rahanga' Iusupu, agáiáná hangko ti'ara manihe' mohamboko, ambi'na mi'i Maria kálá'eá, hai kakálá'eána iti ánti kuasa'na Inao to Magasa'. 19Iusupu iti tauna to manótó laluna, ono' mi'i hane'i nauli' i laluna, “Ina kupogááka ngkánii'-nii' Maria,” láwi' ti'ara naunde' mopakahiliá Maria. 20Tanga'na Iusupu mampepekiri, ia leta'. I kaleta'na iti, mampaturuá. Ia moita hadua mala'ekana Pue' to mohángá'á, “Iusupu, pemule'ána Datu Daudi'! Inee'ko' maláá' moala Maria mewali' toinámu, láwi' Ánángkói' iti nakákálá'eánga ánti kuasa'na Inao to Magasa'. 21Maria ina moánáka hadua ánángkói' tobaleilo, hai Ánángkói' iti ina nuhanga' ‘Iesu’, láwi' Ia to ina mohómpóki taunáNa hangko i huku dósára'.” 22Upu-upuna iti mewali' bona tebukeki Ngkórá'na Pue' to nauki' nabi' Iesaia hangkoia: 23“Hadua áná'ntawine ina kálá'eá hai moánáka hadua ánángkói' tobaleilo. Ánángkói' iti ina rahanga' Imanue'.” Lempóna, “Pue' Ala mamporángáke'.” 24Mearó mi'i Iusupu hai mampeulá'i upu-upu to nahángá'á mala'ekana Pue' Ala iti. Mewali' napohambokoá mpu'u mi'i iti Maria, 25agáiáná ti'ara manihe' moiluhi duu'na Maria moáná'. I kapesupa'na Ánángkói' iti, Iusupu mohanga' “Iesu”.


Copyrighted Material
Learn More

will be added

X\