MATTHAI 2

1Herod he Sengpahrang la a awm vengah Judia ram Bethlehem khawpui ah Jesuh tah thang, Adiw raih thlan ah aisi aka noek thai thlaang khatsut khawlaw ben kalawng Jerusalem la law u tih. 2“Judah sengpahrang la aka awm ham camawca te meah a awm? Ahih kah aisi khawlaw ben ah a thoeng te ka huh u tih ahih te bok hamla ka law” tila a doet u.

3Herod sengpahrang lawng he awl he a yaak vengah lakueng tangkiik, Jerusalem khaw kah thlaang boeih khaw lakueng u. 4Herod lawng khawsoeih ahaamca boeih oen phungawl cangpueikung boeih te a khue tun tih, “me ah nuem Messiah te a thang?” tila ahimi te a doet.

5Ahimi lawng, “Judia ram Bethlehem khawpui ah thang ai “tila a thui pe u.” Tawngha lawng a thut oepsoeh tah he tila awm. 6“Judah ram kah Bethlehem khawpui, nang tah Judah ram khawpui thli la kah ayiit koek la na awm roe nawh, na khui kalawng uktemkung pakhat law vetih ka thlaang Israel thli te a uk ai,” ti.

7Tedawngah Herod lawng khawlaw thlaangcuih thli te ahuepla a khue tih aisi a thoengna atue atang te acek aneh la a doet. 8Tecoengah Herod lawng ahimi te Bethlehem la a tuih tih, “Cet u lang camawca te atheenla tlap uh, na huh u atah van thui uh, kai khaw ka cet silang ahih te ka bok van ai,” tila awl a uen.

9- 10Herod lawng a tina angla cet u tih khawlaw benkah a huh u aisi te a huh koep u vengah awmngaih u tangkiik. Ahimi haiah aisi lawng cet tih camawca a awmna huen a pha ah duem. 11Im khuila kuun u tih camawca oen a manu Meri te a huh u vengah khuklu oen cuengkueng u tih buekuep ruila ahih te a bok u. A khuen u kutdo khawhbu te a awng u tih sui, frankinsen oen mura te a peek u.

12Pathen lawng ahimi te Herod tengla mel koep nawh ham a mang ah ngaithuen awl a thui pe dawngah lawngpui tloe kalawng amah ram la voei koep u.

13Ahimi a ceh coengah, Bawipa kah vanthlaang pakhat Josep mang ah a tueng pe tih, “Herod lawng camawca te ngawn hamla a tlap poen ai. Tedawngah tho lang camawca oen a manu te lo langtah Iyipt ram la pooeng puei loeih, kai lawng mel koep ham kavan thui thlantoe te ah awm uh,” a tina.

14Josep lawng tho tih camawca oen a manu te a lawh tih yiinthuem ah Iyipt ram la a pooeng puei, 15Herod a duek thlantoe Iyipt ram ah awm u. He tila a awmna he tah, Bawipa lawng tawngha hawna oen a thui oepsoeh, “Ka Capa te Iyipt ram kalawng ka khue koep” a ti te asoepna ham ni.

16Khawlaw thlaangcuih thli lawng a thai a latna te Herod lawng a ming vengah caalla a thin sa. Khawlaw thlaangcuih thli lawng a thui aisi a thoengna tue kalawng a tuemtang heet tih Bethlehem khawpui oen khaaw teng khaaw vai kah camaw tawngpaca kumhih hui boeih te ngawn hamla awl a peek.

17He tila tawngha Jeremiah lawng a thui oepsoeh awl te soep. A thui oepsoeh awl tah,: 18“Ramah khaaw ah awl a yaak u, thinphat lungnat rungrahna awl ni. Rachel lawng a ca thli te a rah, A ca thli a duek boeih poen dawngah rap tih a reemhalna ham thloepthloei thai la awm tlaih nawh.”

19Herod a duek coengah, Bawipa kah vanthlaang pakhat tah Iyipt ram ah aka awm Josep mang ah a tueng pe tih, 20“Tho langtah camaw oen a manu te Israel ram la meel puei koep loeih, camaw ngawn ham aka tlap hue te duek boeih poen,” a tina. 21Tedawngah Josep lawng tho tih Camaw oen a manu te a lawh tih Israel ram la a mel puei.

22Tede Arkhelas lawng ana pa Herod yuengla Judia ram ah Sengpahrang a bi tite Josep lawng a yaak vengah te huen la ceh ham a rih. A mang ah a thuituen angla Galili peng la te cet, 23Nazaret a ti u khawpui ah te poe awm. “Ahih te Nazaret thlaang ti u ai,” tila tawngha thli lawng a thui oepsoeh te soep.


Copyrighted Material
Learn More

will be added

X\