MATEO 14

1Ti jim bʌ ora jini yumʌl Herodes tsa’ caji i yubin t’an cha’an ñuc bʌ i melbal Jesús. 2Herodes tsi’ sube x’e’telob i cha’an: Jiñʌch Juan tsa’ bʌ i yʌc’ʌ ch’ʌmja’. Tsa’ cha’ tejchi ch’ojyel ba’an chʌmeño’ bʌ. Jini cha’an woli’ pʌstʌl ñuc bʌ i melbal, che’en. 3Come anix ora Herodes tsi’ chucu Juan. Tsi’ cʌchʌ. Tsi’ yotsa ti mʌjquibʌl cha’an ti’ t’an Herodías, i yijñam Felipe. Jini Felipe i yijts’in Herodes. 4Come Juan tsi’ sube Herodes: Tic’bil ti mandar cha’an mach ma’ pʌyben i yijñam a wijts’in, che’en. 5Herodes yom i tsʌnsan Juan pero tsi’ bʌc’ña winicob x’ixicob, come woli’ yʌlob x’alt’añʌch jini Juan. 6Che’ ti’ q’uiñilel i jabilel Herodes, tsi’ cha’le son xch’oc bʌ i yalobil Herodías ti yojlil xq’uiñijelob. Wen uts’at tsi’ q’uele Herodes. 7Tsi’ wersa wa’choco i t’an. Tsi’ yʌlʌ mi caj i yʌq’uen jini xch’oc pejtelel mu’ bʌ i c’ajtiben. 8Xic’bil cha’an i ña’ jini xch’oc tsi’ yʌlʌ: Aq’ueñon ti colem latu i jol Juan tsa’ bʌ i yʌc’ʌ ch’ʌmja’, che’en. 9Jini rey tsi’ mele i pusic’al. Pero wa’chocobilix i t’an ti’ tojlel xq’uiñijelob. Jini cha’an Herodes tsi’ yʌc’ʌ mandar cha’an mi’ yʌq’uentel jini woli bʌ i c’ajtin. 10Tsi’ choco majlel winic cha’an mi’ set’ t’ojben loq’uel i bic’ Juan ya’ ti cárcel. 11Tsa’ pit ch’ʌjmi tilel i jol Juan ti colem latu. Tsa’ aq’uenti jini xch’oc. Jini xch’oc tsi’ yʌq’ue i ña’. 12Tsa’ tiliyob xcʌnt’añob i cha’an Juan. Tsi’ ch’ʌmbeyob majlel i bʌc’tal. Tsi’ mucuyob. Tsa’ majli i subeñob Jesús. 13Che’ bʌ tsi’ yubi Jesús, tsa’ majli ti barco ti colem bʌ i tiquiñal lum ti’ bajñelil. Che’ bʌ tsi’ yubiyob winicob x’ixicob, jomocña tsa’ loq’uiyob ti tejclum tac cha’an mi’ tsajcañob majlel ti lum. 14Jesús tsa’ tili. Tsi’ q’uele bajc’ʌl winicob x’ixicob. Tsi’ p’untayob. Tsi’ lajmesa jini xc’amʌjelob. 15Che’ wolix ti bʌjlel q’uin, tsa’ tiliyob ba’an Jesús xcʌnt’añob i cha’an. Tsi’ yʌlʌyob: Jiñʌch colem bʌ i tiquiñal pañimil. Tsa’ix ñumi q’uin. Subeñob majlel winicob x’ixicob ti tejclum tac cha’an mi’ mʌñob i bʌl i ñʌc’, che’ob. 16Jesús tsi’ subeyob: Mach wersajic mi’ sujtelob. Aq’ueñob jatetla chuqui mi’ c’uxob, che’en. 17Tsi’ subeyob: Cojach an jo’q’uejl waj yic’ot cha’cojt chʌy, che’ob. 18Jesús tsi’ subeyob: Ch’ʌmʌla tilel ba’ añon, che’en. 19Jesús tsi’ sube winicob x’ixicob cha’an mi’ buchtʌlob ti jam. Tsi’ ch’ʌmʌ jini jo’q’uejl waj yic’ot cha’cojt chʌy. Tsi’ letsa i wut ti panchan. Tsi’ cha’le oración. Tsi’ xet’e jini waj. Tsi’ yʌq’ue xcʌnt’añob i cha’an. Jini xcʌnt’añob tsi’ pucbeyob winicob x’ixicob. 20Tsi’ c’uxuyob ti pejtelelob. Tsa’ ñaj’ayob. Tsi’ lotoyob lajchʌmp’ejl chiquib but’ul ti’ xujt’il tsa’ bʌ colobaji. 21Che’ bajche’ jo’p’ejl mil winicob tsi’ c’uxuyob waj. Ya’an ja’el x’ixicob yic’ot alobob mach bʌ anic tsa’ tsijquiyob. 22Jesús tsi’ subeyob ochel ti barco xcʌnt’añob i cha’an, cha’an mi’ ñaxan c’axelob ti junwejl colem ñajb. I bajñel tsa’ cʌle i subeñob sujtel jini winicob x’ixicob. 23Che’ bʌ tsa’ ujti i subeñob sujtel, tsa’ letsi majlel ti’ bajñelil ti bujtʌl cha’an mi’ cha’len oración. Che’ ti ic’ajel ya’an ti’ bajñelil. 24Ya’an jini barco ti ojlil colem ñajb. Woli’ xewulan i bʌ ti ja’. Come woli’ jats’ jini ic’. 25Che’ yomix sʌc’an tsa’ tili Jesús. Woli ti xʌmbal ti pam ja’. 26Jini xcʌnt’añob che’ bʌ tsi’ q’ueleyob woli ti xʌmbal ti pam ja’, tsa’ wen cajiyob ti bʌq’uen. Tsi’ yʌlʌyob: I ch’ujlel jach winic, che’ob. Wen c’am tsi’ cha’leyob oñel cha’an bʌq’uen. 27Jesús tsi’ bʌc’ pejcayob. Tsi’ subeyob: Tijicñesan la’ pusic’al come joñoñʌch. Mach mi la’ cha’len bʌq’uen, che’en. 28Pedro tsi’ sube: C Yum mi jatetʌch, subeñon tilel ba’ añet ti’ pam ja’, che’en. 29Jesús tsi’ sube: La’, che’en. Che’ bʌ tsa’ loq’ui Pedro ti barco, tsa’ caji ti xʌmbal ti pam ja’ cha’an mi’ majlel ba’an Jesús. 30Che’ bʌ tsi’ q’uele ic’ tsa’ caji ti bʌq’uen. Tsa’ caji ti ochel majlel ti ja’. C’am tsi’ cha’le t’an. Tsi’ yʌlʌ: C Yum, coltañon, che’en. 31Jesús tsi’ bʌc’ choco majlel i c’ʌb. Tsi’ chucu Pedro. Tsi’ sube: Jatet mach bʌ anic ma’ ñop ti pejtelel a pusic’al, ¿chucoch tsa’ tejchi tile bixel bʌ a pusic’al? che’en. 32Che’ bʌ tsa’ ochiyob ti barco tsa’ lajmi ic’. 33Jini año’ bʌ ti’ mal barco tsa’ tiliyob. Tsi’ ch’ujutesayob Jesús. Tsi’ yʌlʌyob: Isujm i Yalobilet Dios, che’ob. 34Che’ bʌ tsa’ c’axiyob, tsa’ c’otiyob ti’ lumal Genesaret. 35Jini winicob ya’i che’ bʌ tsi’ cʌñʌyob Jesús, tsa’ caji i pucob majlel t’an ti pejtelel i lumal. Tsi’ pʌyʌyob tilel ba’an Jesús pejtelel xc’amʌjelob. 36Tsi’ c’ajtibeyob cha’an mi’ tʌlbeñob i yoc i pislel. Tsa’ lu’ c’oq’uesʌntiyob jini tsa’ bʌ i tʌlbeyob i pislel.


Copyrighted Material
Learn More

will be added

X\