MATTHAI 6

1“Ccungccaw`ae nynh muihku khylan minmin malang ryachi bawngnaw na pya khyh nawlan oh la raeringkuh oh; tukhyh lanze vaawran kya um paw nae Paaw kya-e amee na mue lan khyh oh. 2Tukeiccu ryachi bawngnaw he na pya vae ze cyihruh`ae nynh sinakok`ae kya te laanpi`ae kyakhe ccungccaw`ae kya-e phuesanaw ccou khylan a cyi`ae hawte na malang mungkae la tu nan. Byaccaccing kae hopya oh, minmin tuh mih ryalaw mee kha phe a mue vae`ae. 3Thuasalama ryachi bawngnaw he na pya vae ze na ranglang kuih nynh paw nynh a cyi cipaw kha na voilang kuih la nysah nan. 4Ou tuhte ryachi bawngnaw na pya paw kha hung nynh san a ny khyh ccaw; te aphirute cyipaw a muih paw na Paaw amaw ccaccei nynh raerae muih lante amee kha ae pya cih. 5“Te saw he na sang vae ze cyihruh`ae hawte la cyih nan; pawccecize minmin tuh sinakok`ae kya, te laanpi`ae atungkunaw kya ccungccaw`ae nynh muihku khylan thadyn lante nynh sawsang a ry`ae. Byaccaccing kae hopya oh, minmin tuh mih ryalaw mee phe a mue vae`ae. 6Thuasalama nang tuh saw he na sang vae ze na khaan lungkhu lang tee lah na thuakaw he na khaw te, muih leipaw kya um paw na Paaw kalan khe sawsang, te aphirute cyipaw a muih paw na Paaw nynh raerae muih lante amee kha ae pya cih. 7Thuasalama saw he na sang vae oh ze lawki`ae nynh a cyi`ae hawte accakaepaw bya pei hothuipaw kha mang nan oh; pawccecize minmin nynh patae a ho`ae paw liate oun thaepah hua cih`ae cite a tuaku`ae. 8Tukeiccu nanning tuh minmin hawte cyih bua nan oh; pawccecize nae Paaw nynh paw uccaw`ae nynh nanning elan aho cipaw amaw na ngia maw oh phe a ny vae. 9Tukeiccu hynhcihte sawsang oh: Vaawran kya um paw kaening Paaw, na min sawtuanaw um sah. 10Na peenaw thua ccavae sah. Vaawran kya na rynaw acyikuh hawte laephi vawlan cyikuh bua sah. 11Nin takyh kae ae paw looh atunin kaening oun pyabua. 12Te kae tungvaw a sei`ae paw kae ngaethya`ae hawte kae seinaw kha oun ngaethyabua. 13Te tuh-ounaw lungkhu lang oun cciakhae nan, thuasalama ahoy leipaw kyate oun khumtua. Pawccecize peenaw, lesaenaw te phu-enaw tuh zungzae na kya-e nynh thua. Amen. 14“Pawccecize nanning nynh ccungccaw`ae cyiseinaw kha na ngaethya oh ze vaawran um paw nae Paaw nynh mah nanning kha ae ngaethya cih oh. 15Thuasalama nanning nynh ccungccaw`ae cyiseinaw kha na ngaethya khyh oh ze, nae Paaw nynh mah nanning cyiseinaw kha ae ngaethya lan khyh oh. 16“Tuhlaeze looh-ae he na sung vae oh ze, cyihruh`ae hawte a ngaethahpaw maesue te la um nan oh; pawccecize minmin tuh ccungccaw`ae malang looh-ae a sung paw hawte langku khylan mih maesue kha a umsaku`ae. Byaccaccing kae hopya oh, minmin tuh mih ryalaw mee kha phe a mue vae`ae. 17Thuasalama nang looh-ae he na sung vae ze na lu kha sathothuhkuh lah na mae la phikuh. 18Ou tuhte ccungccaw`ae malang looh-aesung paw hawte na langku khyh ccaw, thuasalama muih leipaw kya a um paw na Paaw malang na langkuh cih; te aphirute cyipaw a muih paw na Paaw nynh raerae muih lante amee kha ae pya cih. 19“Laehaw te chihhang nynh a ronaw te miruh`ae nynh kiabia`ae zah a runaw`ae laephi vawlan naemaw hanlan sisua`ae kha ccykuh nan oh. 20Thuasalama laehaw te chihhang nynh mah a ro leinaw, te miruh`ae nynh mah a kiabia leinaw`ae te a ru leinaw`ae vaawran kyakhe naemaw elan sisua`ae kha ccykuh oh. 21Pawccecize nae sisua umnaw kya nae thinlung mah a umbua cih. 22“Pyn kya-e awnaw tuh mit nynh thua; tukeiccu na mit tuh ahoy lanze na pyn balyn tuh awnaw te phe beih cih. 23Thuasalama na mit ahoy khyh ze na pyn balyn tuh mohnaw te phe beih cih. Tukeiccu nang na kya um paw awnaw tuh mohnaw athua ze tuh-e mohnaw tuh pawcih babang mou ale! 24“Hung ccungccaw nynh sanmah bawi luning ryalawpah kho khyh; pawccecize bawi lukheit kha a hua ze lukheit kha a sungsah cih; tukhyhze lukheitpaw kalan a pang ze lukheitpaw kha pawlangria leite a um cih. Nanning nynh Pachia te phuasui kha rya na lawpah kho khyh oh. 25“Tukeiccu nanning kae hopya oh, pawmou kae ae cih, tukhyhze pawmou kae nia ngaw cite nae hiinnaw hanlan nae lungriathae nan sah. Te pawmou kae lawkuh cih cite nae pyn hanlan nae lungriathae nan sah. Hiinnaw tuh aepaw laeze sunghua khyh tou? Te uccaw laeze pyn tuh sunghua khyh tou? 26Vaaw lang-e pavaw`ae khu dotua oh. Minmin tuh ccaciivua khyh`ae, looh mah rue khyh`ae, ccunginn lungkhu lang mah ruinkuh khyh`ae; tuhzemah vaawran um paw nae Paaw nynh minmin kha a dang`ae. Nanning tuh minmin laeze patae nae phutehua khyh tou? 27Nanning lakuze hungmou thinphangnaw liate amaw a hangnaw kha dung kheit a hangchih sakuh khopaw um? 28“Tukeiccu pawccemou uccaw hanlan nae lungvawsaw? Rangkaw e lilipaw`ae kha pawcihte nynh a lethung`ae cipaw tuatua oh; minmin tuh loopho khyh`ae, laaw mah sukuh khyh`ae. 29Tuhzemah nanning kae hopya oh, Solomon a phu-enaw balyn nynh heize lilipaw ccangkheit tuhte ccaankuh kho khyh. 30Tukeiccu, pou zynnaw azya`ae paw nanning, atunin um zah awkhualan tahkuamaee lungkhu lang phung athua paw rangkaw-e lonua hei kha Pachia nynh tuhte a ccaan lanze, nanning kha tuhlaeze houh ae ccaan lan khyh oh tou? 31Tukeiccu, ‘Pawmou ah ae cih oh? Tukhyhze pawmou ah neih cih oh? Tukhyhze paw uccaw mou ah lawkuh cih oh?’ cite nae lungriathae nan sah. 32Pawccecize hynh-e uccaw`ae balyn hynh Zenta`ae nynh a ccung`ae paw nynh thua; pawccecize vaawran um paw nae Paaw nynh hynh-e uccaw`ae balyn tuh nae hanlan aho cipaw phe a ny. 33Thuasalama Pachia peenaw te a dingnaw kha masaty ccung oh, te hynh-e uccaw`ae balyn kha pyachih na thua cih oh. 34Tukeiccu awkhualan hanlan nae lungriathae nan sah, pawccecize awkhualan nynh amaw elan a lungriathae cih. Nin kheit hanlan kha-e nin e lungriathaenaw tuh phe azaw.


Copyrighted Material
Learn More

will be added

X\