MATTHAIA 6

1“Nin sin ṭha thawhei chu, mî hmû ding maia thawloi dingin fîminkhur roi. Achangnawchun nin Pa rivân ami laka lawmhman reng hmû naw tunu. 2Maleiachun, nang chun inrianghmûna sin ni thaw hin, ni hmâa tongtorawt inritir naw ro. Mî vervêkheiin mî inpâk hlaw dingin sinagoghei nih kotthlerhei achun an thaw ṭhin angkan. Tak takan nangni kê hril hi, anni chun an lawmhman an hmû ta. 3Nang rochun, inrianghmûna ni pêk hin, ni kut chang tiang ithaw chu, nê voi tiangin hawi ta naw rise. 4Nên rianghmûna chu inthupa a omna dingin. Ni Pa arûka hmû ṭhinpu chun lawmhman nang pê a ti. 5“Chun nin ṭonginṭaiin, mî vervêkhei angka chang naw roi. Anni chun sinagoghei nih lam sîrhei achun mî hmû dinga ngîr puma ṭonginṭai hi an awi ṭhina. Tak takan nangni kê hril hi, anni chun an lawmhman an hmû ta. 6Nang rochu, ni ṭonginṭaiin ni pindan sûnga lût inla, In khâr inla, ni Pa arûka om hniang achun ṭonginṭai ro. Ni Pa arûka hmû ṭhinpu chun lawmhman nang pê a ti. 7Nangni chu nin ṭonginṭaiin Gentelhei angkan non vû vû naw roi. Anni chun tamka an ti leiin inngaithla pêk chang dingin an inngai. 8“Maleiachun, anmani angka chang naw roi. Nin Pa rivân ami chun nin thil ṭûl chu nin hnî hmâ rengin a hawi. 9Maleiachun, mangka hin nin ṭonginṭai ding achang: Kin Pa rivân ami, Ni rihmîng Thianginhlimin om rise, 10Nên lalnaram hong tlung rise. Ni awidân rivâna thaw achang angkan, Rinêng homa thawin om rise. 11Vawna kin tlâikhop nêkfâk ni pê ro. 12Anên bânghei kin ngaidam angkadênin Kin inbâng ni ngaidam ro. 13Thlêmna a ni ṭhui naw inla, Changrochu, ṭhatloina aṭangin ni sansuak ro. Lalnaram, sinthawtheina nih roiinpuina chu chatuana ni ta achang leiin. Amen. 14“Mî bawsiatnahei nin ngaidam chun, nin Pa rivâna mîin nangni ngaidam vê a ti. 15Changrochu, mîhei an bawsiata nin ngaidam naw chun, nin bawsiatnahei nin Pa rivâna mîin nangni ngaidam bîk naw ni. 16“Chun, nin ngheiin mî vervêkhei angkan ngûi hmêl pu naw roi. Anni chun, mî hnianga nghei angka an lang theina dingin an langdân an ngaisak ṭhin no. Tak takan nangni kê hril hi, anni chun an lawmhman an hmû ta. 17Nang rochun, ni ngheiin ni lû sahriak bua inla, ni hmâi phî ro. 18Kachun, ni ngheina chu mîin an hmûloina dingin. Changrochu ni Pa arûka ompu chun nang a hmû. Chun, ni Pa arûka hmûpu chun lawmhman nang pê a ti. 19“Rinênga nin dingin roi khawlkhawm naw roi. Ma hi chun phuhlup nih tuiêkin an fâk siata, rûkrûin an ṭhiaka an lût khuma, an inrû ṭhin. 20Changrochu rivâna nin dingin roi khawlkhawm zawk roi. Ma hmun achun phuhlup nih tuiêk homin an fâk siat nawa, rûkrûin an ṭhiaka an lût khum nawa an inrû no. 21Ni roi omna paia ni lungril hom om a ti. 22“Taksa lêm chu mit hi achang. Maleiachun, ni mit a vâr chun, ni taksa pum chu êngin sip a ti. 23Changrochu, ni mit a siat chun, ni taksa pum chu zîng rît a ti. Maleiachun, nangma a êng chu zîng changsiala, zîng chu inkatawka nânsa mo achang ding! 24“Tûhmanin pu inhnika rong an bawl thei no. Asanchu Khatka hua a tia, a dang chu hmangai a ti. Achangnawlemo, khatka laka ringom a tia, a dang chu hmusit a ti. Pathian nih sum nih puan rong ni bawl kop thei no. 25“Maleiachun, nangni kê ti hi. Nin nunna thûa, imo nin fâk ding, imo nin in ding, achangnawlemo, nin taksa thûa, imo silin nin zêm ding, tiin lungkham naw roi. Nêkfâk hnêkin nunna, silzêm hnêk homin taksa a hlû zawk naw mo? 26Chunga vâhei khi enta u, chîmu an tû nawa, an ât nawa, fasêk a thlâichi an inlût ṭhin no. Achang, nin Pa rivâna mîin a chawm. Nangni chu anmani hnêkin nin hlû zawk naw bei? 27Tûmo nin lâia a lungkham leia a dung tongka tal insângtir thei om? 28“Iding mo silzêm thûa nin lungkham? Rama tûktin pâr ngaitua ta u, inkata hong ṭhanglian mo an chang? An dok nawa, pat hom an kher lêm no. 29Nangni loi hril rong, Solomon a hom ha a roiinpuina kapaiin ân thuam homin mahei lâia khatka tluk homin ân thuam no. 30Tûnhin, ram sûl, vawna oma, thaia lungthua pai mai ding hman Pathianin mangka khopa a vaw chun, aw, nangni ringna derindêphei, ani chun ma hnêka tamin nin chunga thaw naw ni bei? 31“Maleiachun, ‘Imo fâ ei ti?’ achangnawlemo, ‘Imo in ei ti?’ achangnawlemo, ‘Imo silin zêm ei ti?’ tiin lungkham buai naw roi. 32Asanchu mahei kapai chu Gentelheiin nghâkhmaw vaika an izong ṭhin achang. Ma thil kapai nin ṭûl ti chu nin Pa rivân amiin a hawi. 33“Changrochu, Pathian lalnaram nih a felna chu zong hmasak zawk roi. Kachun, mahei kapai chu pêk belsapin om nin ti. 34Maleiachun, thaia dingin lungkham buai naw roi. Thâia thû chu, thâi dênin la lungkham rise. Nîka intak hi nîka ding chun ân tawk.


Copyrighted Material
Learn More

will be added

X\