MATTHAI 1

1Himi hi Abraham-ih fapa, David-ih fapa, Jesu Khrih sungkua thlahawkdan cazual a si. 2Abraham cu Isak-ih pa a si. Isak cu Jakob-ih pa a si. Jakob cu Judah le a unaupawl ih pa a si. 3Judah cu Perez le Zerah ih pa a si. An nu cu Tamar a si. Perez cu Hezron-ih pa a si ih, Hezron cu Ram-ih pa a si. 4Ram cu Amminadab-ih pa a si. Amminadab cu Nahson-ih pa a si. Nahson cu Salmon-ih pa a si. 5Salmon cu Boaz-ih pa a si. Boaz-ih nu cu Rahab a si. Boaz cu Obed-ih pa a si. Obed-ih nu cu Ruth a si. Obed cu Jesse-ih pa a si. 6Jesse cu Siangpahrang David-ih pa a si. Siangpahrang David cu Solomon-ih pa a si. Solomon-ih nu cu Uriah-ih nupi a rak si dah. 7Solomon cu Rehoboam-ih pa a si. Rehoboam cu Abijah-ih pa a si. Abijah cu Asa-ih pa a si. 8Asa cu Jehoshafat-ih pa a si ih, Jehoshafat cu Joram-ih pa a si. Joram cu Uzziah-ih pa a si. 9Uzziah cu Jotham-ih pa a si ih, Jotham cu Ahaz-ih pa a si. Ahaz cu Hezekiah-ih pa a si. 10Hezekiah cu Manasseh-ih pa a si ih, Manasseh cu Amon-ih pa a si. Amon cu Josiah-ih pa a si. 11Babilon mipawl in, Jew-pawl Babilon ih an hruai lai hrawngah Josiah cu Jekoniah le a unaupawl ih pa a si. 12Babilon ih an hruai hnuah, Jekoniah cu Shealtiel-ih pa a si. Shealtiel cu Zerubbabel-ih pa a si. 13Zerubbabel cu Abiud-ih pa a si. Abiud cu Eliakim-ih pa a si ih, Eliakim cu Azor-ih pa a si. 14Azor cu Zadok-ih pa a si. Zadok cu Akhim-ih pa a si ih, Akhim cu Eliud-ih pa a si. 15Eliud cu Eleazar-ih pa a si. Eleazar cu Mathan-ih pa a si ih, Mathan cu Jakob-ih pa a si. 16Jakob cu Joseph-ih pa a si. Joseph cu Khrih an ti mi Jesu hringtu Mary-ih pasal a si. 17Curuangah, san hmuahhmuah cu Abraham ihsin David tiang san hleili, David ihsin Babilon sal ih an tan tiang san hleili, sal an tan ihsin Khrih tiang san hleili a si. 18Jesu Khrih suahnak cu hitin a si. A nu Mary cu Joseph thawn an hamaw. An ṭhitawk hlanah Mary cu Thlarau Thianghlim in fa a vunter ti Joseph in a theisuak. 19Cule, a pasal Joseph cu midingfel a si. Mipi theihih Mary mualphoter a duh lo ruangah athupten Mary cu tansan a tum. 20Ngai hnik, cui thupawl a ruah rero laiah a mang ah Bawipai vancungmi cu a hnenah a lang ih, “David fapa Joseph, Mary na nupiih ṭhit ding ṭih hlah. Ziangahtile, a vun mi fa cu Thlarau Thianghlim hnen ihsin a si. 21Anih in fapa a hring ding ih, Jesu tiah hmin na sak ding. Ziangahtile, anih in a mipawl kha an sualnakpawl ihsin a rundam ding a si,” tiah a ti. 22Cumi cun profet hmang in Bawipa in a cang lai ding mi a rak sim mi cu a thlengkimter a si. 23Profet cun, “Ngai hnik, fala him in fa a vun ding ih, fapa a hring ding. A hmin ah ‘Immanuel,’ tiah an ko ding,” tiah a ti. Immanuel tiih a tican cu, “Pathian kan hnenah a um,” tinak a si. 24Joseph cu a ihthahnak ihsin a hung ṭhang tikah Bawipai vancungmi in thu a pek vekin Mary cu a nupi ah a ṭhi. 25A fapa hmaisabik a hrin hlan tiang Joseph in a ihpi lo. Cule Joseph in a fapa cu Jesu tiah hmin a sak.


Copyrighted Material
Learn More

will be added

X\