Matius 1

1Na'a daftar ini, na rtulis Yesus Kristus ubun a nusin ra. Yesus ubun a nusin tali Raja Daud i ubun a nusin Abraham. 2Tali Abraham ti naran Daud, na Yesus ubun a nusin ra nararira ra wean ini: Abraham yanan Ishak, Ishak yanan Yakub, Yakub yanan verin Yehuda, novun a'an a warin ra. 3Yehuda awan verin Tamar, yanarira verin Peres ovu Zerah. Peres yanan Hezron, na Hezron yanan Ram. 4Ram yanan Aminadab, Aminadab yanan Nahason, Nahason yanan Salmon. 5Salmon awan verin Rahab, yanarira verin Boas. Boas awan verin Rut, yanarira verin Obed. Obed yanan Isai. 6Isai yanan verin Daud i notu raja na'a Israel. Daud awan verin Batsyeba, yanarira verin Salomo. Lan a Batsyeba nsifa vali ovu Uria. 7Salomo yanan Rehabeam, Rehabeam yanan Abia, Abia yanan Asa. 8Asa yanan Yosafat, Yosafat yanan Yoram, Yoram yanan Uzia. 9Uzia yanan Yotam, Yotam yanan Ahas, Ahas yanan Hizkia. 10Hizkia yanan Manasye, Manasye yanan Amon, Amon yanan Yosia. 11Yosia yanan verin Yekhonya novun a'an a warin ra. Na'ut inyai, na tamata Babel ra rkiwal Israel ra ma ti rna'a Babel. 12Na'ut i tamata Babel ra rkiwal Israel ra ma ti rna'a roak Babel, beti Yekhonya yanan verin Sealtiel, Sealtiel yanan a Zerubabel. 13Zerubabel yanan Abihud, Abihud yanan Elyakim, Elyakim yanan Azor. 14Azor yanan Zadok, Zadok yanan Akhim, Akhim yanan Eliud. 15Eliud yanan Eleazar, Eleazar yanan Matan, Matan yanan Yakub. 16Yakub yanan verin Yusuf i awan verin Maria. Maria ini yanan Yesus i rfanara vali Ia ne Kristus, Raja i ntevut dida salasilan ra. 17Ba Yesus ubun a nusin ovi beti tbas yai: Tali Abraham ti naran Daud, na tuvu nkati tuvu ti naran vutu rahin ifa'at. Tali Daud ti naran na'ut i tamata Babel ra rkiwal Israel ra ma rti Babel, na tuvu nkati tuvu ti naran vutu rahin ifa'at vali. Tali na'ut i rna'a Babel ti naran i rarali Kristus, Raja i ntevut dida salasilan ra, na tuvu nkati tuvu ti naran vutu rahin ifa'at vali. 18Yesus Kristus Ni tomu mnga'un a na'ut i rarali Ia wean ini. Ia renan naran Maria. Maria ini irua Yusuf ra'an vai isa roak mane rsifa. Ira wol rsifa obin, na'uk Maria nbarlewan roak, tevek ngrebat tali Ubu Ni Roh. 19Yusuf ni vava'at nmalola, ovu wol inan ma nfama'it Maria na'a tamata rivun waharira ralan a, ba nanovak mane ntalik fanfonak watan ia. 20Na'uk ti ma Yusuf nanovak munuk wean inyai ma ntuba, na Duila'a Ni sansinir isa ntali lanit ratan nma ma nfavotuk ia verin Yusuf na'a ni mifi a. Ia nfalak ne, “Yusuf, Daud ubun a nusin oa, deka ralam raruan ma mala Maria ma neluk awam, tevek kasiko'u yanat i na'a evun ralan yai ntali Ubu Ni Roh a. 21Maria veka nrali kasiko'u brana isa, ma oa ki fwanara ia ne Yesus, tevek Ia veka nsikat Ni tamata ra tali rira salasilan ra.” 22Afa avyai rvotuk munuk roak, boma rfakena afa ovi lan a Duila'a nfalak verin Ni nabi a ma ntulis ne, 23“Vata mnelat isa veka nbarlewan ma nrali kasiko'u brana isa, velik ne wol ntuba ovu brana obin. Tamata ra veka rera Ia ne Imanuel, ihin a na'a vai Ibrani ne, ‘Ubu novun ita.’ ” 24Ti ma Yusuf nbatar, na not-orang afa ovi Duila'a Ni sansinir yai nfalak verin ia. Ia nala Maria ma neluk awan, 25na'uk irua wol rtuba isa ti naran i nrali kasiko'u brana yai. Ti ma nrali ia, na Yusuf nfanara kasiko'u yai ne, Yesus.


Copyrighted Material
Learn More

will be added

X\