MATIUS 6

1"Matar do'-do', pad muyuh na nganau' kekamen muyuh luk matu pa kiung lemulun mo', idi ngaceku sikal sirendeh; ngaceku kudeng muyuh nganau' kudeng ineh, muyuh na miak ngalap tabpar ratnan Taman muyuh luk bang surga. 2"Ngaceku ineh kareb iko maré usin kuan lun masi', aleg iko ngiup serupit pa atunmu kudeng luk ruen lun luk siayu bang ruma' sembayang idi iring dalan, ngaceku piandeh buren dulun. Ngerawé do'-do'! Ideh pangeh nengalap tabpardeh. 3Iamo' kareb iko maré usin kuan lun masi', aleg nima' ticu'mu pa kabing kali' luk ruen ticu'mu pa tinueh, 4pad usin luk barénmu kuan lun masi' ineh na miak kali' dulun. Idi Tamanmu luk nier amung-amung luk na megala' ineh, sikal ngua' kuanmu. 5"Kareb muyuh sembayang, aleg muyuh kudeng lun luk siayu! Ideh sikal tuped sembayang bang ruma' sembayang idi nan lisangen dalan, pad ideh miak siren dulun. Ngerawé do'-do'! Ideh pangeh nengalap tabpardeh. 6Iamo' kareb iko sembayang, do' semuet bang takepmu, idi ngitek tanga' takep ineh, idi sembayang nan Tamanmu luk na melagan. Idi Tamanmu luk nier amung-amung luk na melagan ineh, sikal ngua' kuanmu. 7"Kareb iko sembayang, aleg iko lubed-lubed bala mepad kudeng lun pupu baken; ngaceku ideh ngerawé sembayangdeh pedingeren ngaceku baladeh mula'. 8Aleg muyuh nginud lemulun ineh, ngaceku Taman muyuh kali' luk inan ulek kuan muyuh, kareb nateh muyuh mutuh rat Neneh. 9Do' muyuh sembayang kudeng ini: 'O Taman kai luk bang surga, do' ngadanMu uen ngerayeh 10Do' ImetMu uen ngacing, idi luk pianMu mangun bang tana', mepad kudeng bang surga. 11Maré nekai aco sini akan luk petap. 12Maré do' ratnan amung sala' kai, mepad kudeng kai pangeh nemaré do' ratnan amung sala' dulun. 13Aleg nima' nekai tetunin Iblis, iamo' muit nekai ratnan laludneh.' [Iko luk kuan Imet, idi lalud idi rayeh, macing ruked-ruked peh, Amin.] 14"Ngaceku kudeng muyuh maré do' ratnan sala' dulun, Taman muyuh luk bang surga pana' sikal maré do' kuan muyuh. 15Iamo' kudeng muyuh na sikal maré do' ratnan sala' dulun, Taman muyuh pana' nateh sikal maré do' ratnan sala' muyuh. 16"Idi teh, kareb muyuh mawa', aleg tekedamut kiung mepad kudeng lun luk siayu, ngaceku ideh siisu' kiungdeh, pad lun baken ngerawé nedeh mawa'. Ngerawé do'-do'! Ideh pangeh nengalap tabpardeh. 17Kareb iko mawa', do' iko ngumau uluhmu idi maru' kiungmu, 18pad lemulun na kali' namu mawa', iamo' Tamanmu luk na melagan ineh miak kali'; idi Tamanmu luk nier amung-amung luk na melagan ineh, sikal ngua' kuanmu. 19"Aleg nganug binaweh bang tana' ini, su luk inan kutang idi tugor luk ngerapuk neneh, idi lun mano luk ngurak ruma' idi mano. 20Iamo' do' muyuh nganug binaweh bang surga, su luk na kutang idi tugor luk ngerapuk, idi na lun mano luk ngurak ruma' idi mano. 21Ngaceku iapeh-iapeh luk inan binawehmu, su ineh teh niatmu. 22"Mateh ineh mepad kudeng lapung. Kudeng matehmu do', amung buburmu pana' macang. 23Iamo' kudeng matehmu dat, amung bururmu pana' medacem. Idi kudeng acang luk bang bururmu medacem, kali' rungen dacem ineh pelaba rayeh. 24"Na selemulun luk miak ngakem kuan dueh tuan' ngaceku na miak na seburur inanneh megateh idi luk baken ineh inanneh mawa, idi ieh lutep inan seburur idi megateh inan seburur. Muyuh na miak mangun ku demulun Allah, idi demulun binaweh tana' ini teh. 25"Ngaceku ineh Ui pebala nemuyuh, aleg merapang ratnan ulun muyuh, ieh ineh ratnan luk miak kenen muyuh idi luk urpen muyuh; idi ratnan ayung kuan burur muyuh. Naké ulun ineh meluun ratnan luk kenen idi burur ineh meluun ratnan ayung? 26Siruh, suit-suit luk arang gawa', na ideh ngisak idi na ideh ngeranih, idi na ideh ngamung akan bang lepo; idi Taman muyuh luk bang surga maman nedeh. Naké muyuh meluun raga ratnan suit-suit ineh? 27Idéké rat arang muyuh miak ngekadang ulunneh sesuut pana' ngaceku merapang? 28"Idi ngudehké muyuh merapang ratnan ayung? Ngerawé ratnan ulun busak bunga', na ideh ngakem idi na ideh nguper gitian. 29Iamo' Ui pebala nemuyuh: Selimun, sagan tu pana' lun do', na nengayung ku luk do' kudeng sebuleng busak ini. 30Kudeng Allah ngayung uduh, luk mulun aco sini idi kenebpaneh ieh talan bang tetel apui, naké Ieh meluun pian ngayung nemuyuh, O muyuh luk na petap anu? 31Ngaceku ineh, aleg muyuh merapang idi pebala: 'Anunké luk kenen kai? Anunké luk rupen kai? Anunké luk miak lungen kai?' 32Lun pupu baken pana' nakap amung ineh, idi Taman muyuh luk bang surga meluun kali' amung ineh inan ulek kuan muyuh. 33Iamo' do' atun nakap ImetNeh dengan amung luk pianNeh; idi amung ineh miak barén Allah nemuyuh. 34Ngaceku ineh aleg muyuh megagau ratnan nebpa, ngaceku nebpa inan gagauneh sebuleng. Aganeh susa' seaco petap mo' bang seaco.


Copyrighted Material
Learn More

will be added

X\