Matthew 1

1Abrahama fapa, Davida fapa, Isua Krista thlahtute ziahna bu chu. 2Abrahama lakah Isaaka a pianga a, Isaaka lakah Jakoba a piang a. Jakoba lakah Juda leh a unaute an piang a, 3Juda leh Tamari lakah Peresa leh Zera an piang a. Peresa lakah Hezrona a piang a, Hezrona lakah Rama a piangt a. 4Rama lakah Aminadaba a piang a, Aminadaba lakah Nahsona a piang a. Nahsona lakah Salmona a piang a, 5Salmona leh Rahabi lakah Boaza a piang a. Boaza leh Ruthi lakah Obeda a piang a, Obeda lakah Jesaia a piang a. 6Jesaia lakah lal Davida a piang a. Tin, Davida leh Uria nupui lakah Solomona a piang a. 7Solomona lakah Rehoboama a piang a, Rehoboama lakah Abija a piang a. Abija lakah Asa a piang a, 8Asa lakah Jehosaphata a piang a. Jehosaphata lakah Jehorama a piang a, Jehorama lakah Uzia a piang a. 9Uzia lakah Jothama a piang a, Jothama lakah Ahaza a piang a. Ahaza lakah Hezekia a piang a, 10Hezekia lakah Manasea a piang a. Manasea lakah Amona a piang a, Amona lakah Josia a piang a. 11Babulona sala hruai an nih lai vêl khân Josia lakah Jekonia leh a unaute an piang a. 12Tin, Babulona sala hruai an nih hnuin Jekonia lakah Shealtiela a piang a, Shealtiela lakah Zerubabela a piang a. 13Zerubabela lakah Abiuda a piang a, Abiuda lakah Eliakima a piang a. Eliakima lakah Azora a piang a, 14Azora lakah Zadoka a piang a. Zadoka lakah Akima a piang a, Akima lakah Eliuda a piang a. 15Eliuda lakah Eleazara a piang a, Eleazara lakah Matthana a piang a. Matthana lakah Jakoba a piang a, 16Jakoba lakah Mari pasal Josepha chu a piang a. Chu Mari lakah chuan Isua, ‘Krista,’ tia koh chu a lo piang ta a. 17Chutichuan chhuan zawng zawng chu, Abrahama aṭanga Davida thlengin chhuan sâwm leh chhuan li a ni a. Davida aṭanga Babulona sala hruai thlengin chhuan sâwm leh chhuan li a ni leh a. Tin, Babulona sala hruai aṭanga Krista thlengin chhuan sâwm leh chhuan li a ni leh bawk a ni. 18Isua Krista lo pian dân chu hetiang hi a ni: A nu Mari chu Josepha nên an inhual laiin, an inpâwl hmain, Thlarau Thianghlimin a raitîr tih hriat a lo ni a. 19Nimahsela, a pasal tûr Josepha chu mi fel tak a ni a, Mari chu mualphotîr a duh lo va, a rûka bânsan a tum a. 20Nimahsela chûng thu chu a ngaihtuah laiin ngaiteh, a mumangah Lalpa vântirhkoh a hnênah a rawn inlâr a, “Joseph, nang Davida fapa, i nupui atân Mari chu neih hlâu suh, a naupai chu Thlarau Thianghlim paitîr a ni asin. 21Fapa a hring ang a, ani chuan amite an sualte lakah a chhandam dâwn avângin a hmingah ISUA i sa ang,” a ti a. 22- 23Lalpa’n a zâwlnei kaah, “Ngaiteh, nula, tuma la pâwl loh chu a rai ang a, Fapa a hring ang a, a hmingah ‘Emmanuela,’ an sa ang,” tia a sawi kha a lo thlen famkim theih nân chûng zawng zawng chu a lo awm a ni. Emmanuela chu, “Kan hnêna Pathian awm,” tihna a ni. 24Tichuan Josepha muhîl chu a tho va, Lalpa vântirhkohvin a hnêna thu a pêk ang chuan a ti a, Mari chu a nupuiah a nei ta a. 25Nimahsela, a Fapa hmasa ber a hrin hmâ loh chuan a pâwl lo. Tin, Josefa chuan a hmingah, ‘ISUA,’ a sa ta a.


Copyrighted Material
Learn More

will be added

X\