Matthew 2

1Lal Heroda a lal laia Judai rama Bethlehem khuaa Isua a lo pianin, ngaiteh, khawchhak lam aṭangin mi fingte Jerusalemah an lo kal a. 2“Khawiah nge Judate Lal lo piang chu? Khawchhak lamah a arsi kan hmu a, amah chibai bûk tûrin kan lo kal a ni,” an ti a. 3Lal Heroda’n chu chu a hriatin, amah leh Jerusalema mi zawng zawngte chu an mangang ta a. 4Tichuan puithiam lalte leh mite hnêna dânzirtîrtute zawng zawng a ko khâwm a. Krista pianna tûr chu a zâwt a. 5Anni chuan a hnênah, “Zâwlneiin hetianga a ziah avâng hian Judai rama Bethlehem khuaah a ni ang. 6‘Nang Bethlehem, Judai rama mi, i chhûng aṭangin rorêltu, a mi Israêlte vêngtu tûr chu a lo chhuah dâwn avângin Judai rama khuate zîngah i tê ber tawp lo tiin,” an ti a. 7Chumi hnuah chuan Heroda’n a rûkin mi fingte chu a ko va, dîlchhût takin arsi lan lai chu a zâwt chhuak a. 8Tichuan anni chu Bethlehem khuaah a kaltîr a. “Kal ta ula, nautê chu uluk takin zawng ula, kei pawhin amah chibai ka rawn bûk ve theih nân amah chu in hmuh veleh mi rawn hrilh ang che u,” a ti a. 9Lal thu chu an hriatin an kal ta a. Tin, ngaiteh, khawchhak lama arsi an hmuh kha naute awmna chung zâwn a thlena a din hmâ loh zawng an hmâah a kal zêl a. 10Arsi chu an hmuhin an hlim nasa êm êm a. 11Tin, in chhûngah an va lût a, a nu Mari hnêna nautê chu an hmu a. An bawkkhup a, chibai an bûk a. An ro bâwmte an hawng a, a hnênah chuan thilthlâwnpêkrangkachak te, beraw te, mura te an pe a. 12Tin, Heroda hnêna kîr leh lo tûra an mumanga hrilha an awm avângin anmahni khaw lamah kawng dangah an haw ta a. 13Tin, an hâwn hnuin ngaiteh, Lalpa vântirhkoh Josepha hnênah a mumangah a inlâr a. “Tho la, nautê leh a nu hruai la, Aigupta ramah tlânchhe rawh. Heroda’n nautê tiboral tûra a zawn thuai dâwn avângin ka hrilh leh hmâ loh che zawng chutah chuan awm reng ang che,” a ti a. 14Tichuan a tho va, azân azânin nautê leh a nu chu a hruai a, Aigupta ramah a kal ta a. 15Lalpa’n a zâwlnei kâa, “Ka fapa chu Aigupta ram aṭangin ka ko chhuak a,” tia a sawi kha a lo thlen famkim theihna tûrin. Heroda thih hmâ loh zawng chutah chuan a awm ta reng a. 16Chutih lai chuan Heroda’n mi fingte tihder a nih a inhriatin a thinur êm êm a. Mi a tîr a, a hun lai tak dîlchhût taka mi fingte a zawh chhuah ang khân Bethlehem leh a vêl zawng zawnga mipa naupang kum hnih achin hnuai lam chu an vaiin a that ta vek a. 17- 18Zâwlnei Jeremia’n, “Rama khuaah thâwm hriat a ni a, sûnna hlâ te, ṭap te, mithi ngaia chiau vawng vawngte. Rakili chuan a fate a ṭah a, an awm tawh loh avângin thlamuan a duh lo,” tia a sawi kha a lo thleng famkim ta a. 19Nimahsela, Heroda a thih hnuin ngaiteh, Lalpa vântirhkoh Aigupta ramah chuan Josepha hnênah a mangah a inlâr a. 20“Tho la, nautê leh a nu hruai la, Israêl ramah kal rawh. Naute thah tuma zawngtute kha an thi tawh e,” a ti a. 21Tichuan a tho va, nautê leh a nu chu a hruai a, Israel ramah a lût ta a. 22Nimahsela, a pa Heroda ai awhin Arkelausa chuan Judai ram chungah ro a rêl tih a hriatin chuta kal chu a hlâu ta a. Tichuan a manga hrilh anih angin Galili ramah a kal ta daih a. 23“Ani chu ‘Nazareth mi,’ an ti ang,” tia zâwlneite kâa sawi tawh chu a lo thlen famkim theih nân khaw pakhat Nazareth an tihah chuan a chêng ta a.


Copyrighted Material
Learn More

will be added

X\