Matu 2

1Im ke Jisōs ear ḷotak i Betleemin Judia ilo raan ko an Herod kiiñ, lo, jet ri kanpilraar itok jān reeaar ñan Jerusalem, 2Im ba, “Ewi Eo ej ḷotak kiiñ an ri Ju ro? Bwe kōm ar lo ijueo An i reeaar, im itōn kabuññan E.” 3Ke Herod kiiñ ear roñjake, ej kūṃkūṃ, im ri Jerusalem otemjej ippān. 4Im ke e ar kokweilọklọk pris reḷap im skraib otemjej an armej raṇ ej kajjitōk ippāer ewi ijo Ri Kraist enaaj ḷotak ie. 5Im re ba ñan e, “Ilo Betleem in Judia: āindein ri kanaan ear je, 6Im kwe Betleem, ilo bukwōn an Juda, kwō jab ediktata ippān irooj ro in Juda; bwe juon irooj enaaj itok jān eok, eo enaaj seperd ro doō Israel.” 7Innām Herod, ke ear ṇooj an āñiñintok ri kanpil, eḷap an kajjitōk ippāer, iien rot eo iju e ar waḷọk. 8Im ej jilkinḷọk er ñan Betleem im ba, “Koṃwin ilen kanooj pukot niñniñ eo; im ñe koṃij lo E, koṃwin bōktok naan ñan eō, bwe in barāinwōt ilem kabuñ ñan E.” 9Ke eṃōj aer roñjake kiiñ eo, rej ilọk; im lo, iju eo raar loe i reeaar, ej kālọk iṃaerḷọk, ñan ioon kajjien ijo niñniñ ej pād ie. 10Ke rej lo iju eo, re ṃōṇōṇō im e kanooj ḷap aer lañlōñ. 11Im rej deḷọñ ilowaan im, im lo niñniñ eo ippān jinen Meri; im rej buñpedo im kabuñ ñan E; im ke eṃōj aer erḷọke ṃweiuk ko ṃweier, rej kaṃṃweiukiuki E; kooḷ, im ijur, im mōr. 12Im kōn an Anij kauwe er ilo tōṇak bwe ren jab jepḷaak ñan ippān Herod, rej ilọk ñan āne eo āneir ilo bar juon iaḷ. 13Im ke re mootḷọk, lo, enjeḷ in Irooj ej weaaktok ñan Josep ilo tōṇak im ba, “Kwōn jerkak im bōk niñniñ im jinen, im ko ñan Ijipt, im kwōn pād ie ñan iien eo Inaaj ba ñan eok; bwe Herod enaaj pukot niñniñ ne bwe en ṃan E.” 14Im ej jerkak, im bōk niñniñ im jinen ilo boñ, im ilọk ñan Ijipt; 15Im ej pād ie ñan tōr eo Herod e mej, bwe en kaṃool naan Irooj ear kōnono kōn ri kanaan im ba, I ar kūrtok nejū ṃaan jān Ijipt. 16Innām Herod, ke e jeḷā bwe ri kanpil raar kajekdọọn e, eḷap an illu, im ej jilkinḷọk im ṃan ḷadik ro otemjej rej pād ilo Betleem im āne otemjej iturin, rūttaer ruo iiō im redik jān er, āinwōt tōr eo ear kanooj jeḷā kake jān ri kanpil ro. 17Innām ar kaṃool naan ri kanaan Jeremaia ear kōnono im ba, 18Ar roñ ainikien i Rema, limō, im jañ, im liaajlọḷ, Rejel e jañūt ro nejin; im bwe re jako, e jab kōṇaan bwe armej ren kaaenōṃṃan būruon. 19A ke Herod e mej, lo, enjeḷ in Irooj ej weaaktok ilo tōṇak ñan Josep i Ijipt, 20Im ba, “Kwōn jerkak im bōk ḷadik im jinen, im ilọk ñan āne in Israel, bwe re mej ro raar kōṇaan ṃan ḷadik ṇe.” 21Im ej jerkak, im bōk ḷadik im jinen, im itok ñan āne in Israel. 22A ke ej roñ bwe Arkileōs ej Irooj ioon Judia, im pinej jenkwan Herod jemān, e lōḷñọñ in ilọk ñan āne eo, a Anij ej kauwe e ilo tōṇak bwe en ilọk ñan jet āne ṃōttan Galili; 23Im ej itok im jokwe ilo jikin kweilọk etan Nazeret, bwe en kaṃool naan ri kanaan raar ba, “Re naaj likūt etan Ri Nazeret.”


Copyrighted Material
Learn More

will be added

X\