मत्ती 1

1इबराइम की सन्तान, दाऊद की सन्तान, ईसु मसीह की बंसावली की पोथी। 2इबराइम से इसाक पेदा होयो, इसाक से याकूब, अने याकूब से यहूदा अने उको भई पेदा होयो, 3अने यहूदा के अपणी बउ तामार से फिरिस अने जोरह पेदा होया, फिरिस से हिस्रोन अने हिस्रोन से एराम, 4अने एराम से अम्मीनादाब पेदा होयो, अम्मीनादाब से नहसोन अने नहसोन से सलमोन पेदा होयो, 5सलमोन अने राहाब से बोअज पेदा होयो, बोअज अने रूत से ओबेद पेदा होयो अने ओबेद से यिसे, 6अने यिसे से दाऊद राजो पेदा होयो। 7दाऊद से सुलेमान उनी बइरा से पेदा होयो जो पेलां उरिय्याह की घराळी थी, सुलेमान से रहबाम पेदा होयो, अने रहबाम से अबियाह ने अबियाह से आसा, 8आसा से यहोसाफात पेदा होयो, अने यहोसाफात से योराम अने योराम से उज्जियाह, 9उज्जियाह से योताम पेदा होयो, अने योताम से आहाज अने आहाज से हिजकिय्याह, 10हिजकिय्याह से मनस्से पेदा होयो, अने मनस्से से आमोन अने आमोन से योसिय्याह: 11अने बेबीलोन माय बन्दी होवा का बखत योसिय्याह से यकुन्याह अने उको भई पेदा होयो। 12बेबीलोन माय बन्दी होवा का बाद यकुन्याह से सालतिएल पेदा होयो, अने सालतिएल से जरुब्बाबिल, अने 13जरुब्बाबिल से अबीहूद पेदा होयो, अबीहूद से इल्याकीम ने इल्याकीम से अजोर, 14अजोर से सदोक पेदा होयो, अने सदोक से अखीम अने अखीम से इलीहूद, 15इलीहूद से एलीयाजर पेदा होयो अने एलीयाजर से मत्तान अने मत्तान से याकूब, 16याकूब से यूसफ पेदा होयो जो मरियम को घराळो थो, अने मरियम से ईसु पेदा होयो जो मसीह केवाय हे। 17असतरा से इबराइम से दाऊद तक सगळी चवदा पीढ़ी हुई, अने दाऊद का बखत से बेबीलोन की बन्धुवई तक चवदा पीढ़ी अने बेबीलोन की बन्धुवई से मसीह तक चवदा पीढ़ी हुई। 18अने मसीह को जनम असतरा होयो के जदे उकी मेतारी मरियम की सगई यूसफ का गेले हुई, तो उणका मिळवा से पेलांज वा पवित्तर आतमा आड़ी से गरभवती थी! 19उको धणी यूसफ धरमी होवा की वजासे उके बदनाम नी करवा की मरजी से छाने-छाने उके छोड़वा को मनसुबो करी र्‌यो थो। 20पण जदे उ सोंचीज र्‌यो थो तो सरग को एक सरगदूत सपना माय उके यो केता नगे आयो, "हे यूसफ दाऊद का बंसज, तू मरियम के अपणी घराळी बणावा से डरे मती, क्योंके जो उकी कोख माय हे उ पवित्तर आतमा आड़ी से हे। 21वा बाळक जणेगा अने तू उको नाम ईसु राखजे, क्योंके उ अपणा लोगहुंण के उणका पापहुंण से तारी देगा।" 22यो सगळो इकासरु होयो के परभु ने जो बचन नबी से केवाड़्यो थो उ पूरो होय: 23"देखो, एक कुंवारी गरभ धारण करेगा, वा एक बाळक जणेगा अने उको नाम इम्मानुएल राख्यो जायगा।" जेको अरथ 'परमेसर हमारा गेले'। 24तो यूसफ नीन्द से जाग्यो अने परमेसर का सरगदूत का हुकम से उके ब्याव करी ने ल्यायो। 25अने मरियम कने तदत्तक नी ग्यो जदत्तक उने बाळक नी जण्यो अने यूसफ ने उको नाम ईसु राख्यो।


Copyrighted Material
Learn More

will be added

X\