Luk 14

1For won Sabat day, wen Jisos go chop for won Farisi oga haus, di pipol kon dey luk am, 2bikos won man wey en hand and leg swel-up, stand for en front. 3Jisos kon ask di pipol wey sabi di law wel-wel and di Farisi pipol sey, "E dey rite to heal for Sabat day?" 4Dem nor tok enitin. Naim Jisos hol di man, heal am kon sey mak e dey go. 5Den Jisos tel dem, "If eni of una get pikin or melu wey fal insaid wel for Sabat day, una nor go kwik-kwik draw am kom out?" 6Bot dem nor fit ansa. 7Wen Jisos si haw di pipol wey dem invait dey rush to sidan for beta chair, e kon tel dem won parabol: 8"Wen dem invait yu go parti, nor rush go sidan for beta chair, bikos di pesin wey dey du di parti fit don invait pesin wey big pas yu. 9"Den di pesin wey invait tu of una go tel yu, 'Get up mak dis man sidan.' Den wit shame, yu go-go sidan for bak. 10"Bot wen dem invait yu, mak yu sidan for bak chair, so dat wen di pesin wey dey du di parti si yu, e go sey, 'My frend, kom sidan for dis beta place for front.' Den all di pipol wey dey folo yu chop, go giv yu respet. 11"Enibodi wey dey kari bodi up, dem go bring am dan and enibodi wey put en bodi for groun, dem go kari am up." 12Jisos stil tel di man wey invait am, "Wen yu dey du parti, nor invait yor frends, brodas, rilashons and nebors wey get moni, so dat wen dem dey du dia own parti, dem go invait yu tu. 13"Insted wen yu dey du big parti, mak yu invait poor pipol, pipol wey dia leg or hand kut komot, pipol wey nor fit waka and pipol wey nor dey si. 14"Den, God go bless yu, bikos dem nor go fit pay yu bak, bot na God go pay yu, wen E go raiz en pipol from deat; di pipol wey du wetin E laik. 15Wen won of di pipol for di parti hear wetin Jisos tok, e kon tel Jisos, "God don bless evribodi wey go chop for di parti for en kindom!" 16Bot Jisos tel am, "Won man du big parti kon invait meni pipol kom. 17"Wen di parti taim rish, e kon tel en savant mak dem go tel evibodi wey e invait sey, 'Mak una kom, bikos evritin don redi.' 18"Bot, all of dem kon dey komplain won by won. Di first won sey, 'I jos buy land and I won go si-am. Abeg, mak yu nor ves.' 19"Anoda won sey, 'I jos buy faiv melu and I dey go luk haw dem bi. Abeg, mak yu nor ves.' 20"Di last won kon sey, 'I nor go fit kom, bikos I jos mari new wife.' 21"So di savant kom bak kon tel en oga evritin wey dem tok. Di oga ves wel-wel kon tel di savant, 'Mak yu go all di strit and kona-kona wey dey dis tawn, go bring poor pipol: pipol wey dia leg or hand kut komot and pipol wey nor fit waka kon di parti.' 22'Afta, di savant sey, 'Oga, I don du wetin yu tok and di parti neva stil ful.' 23"So di oga tel di savant, 'Mak yu go main road and enta evriwer for di aria, tel pipol mak dem kom, so dat my haus go ful.' 24"Bikos I tel yu, non of doz pipol wey I first invait, go taste my fud!" 25Plenti pipol dey waka folo Jisos for road, so e turn luk dem kon sey: 26"If enibodi kom mit mi and e nor luv mi pas en papa, mama, wife, pikin, brodas and sistas, ivun en ownsef, e nor go fit bi my disaipol. 27"Enibodi wey nor gri kari en kros folo mi, nor fit bi my disaipol. 28"Wish of una wey won build big haus, nor go first kakulate weda di moni wey e get go rish to finish am? 29"If e nor du so, wen e don lay di foundashon and e nor fit finish di haus, evribodi wey si wetin hapun, go kon dey laff am. 30"Dem go sey, 'Dis man start to build haus and e nor fit finish am!' 31"Abi wish king wey won go fite anoda king, nor go first sidan tink weda di ten tazon men wey e get go fit fite di twenti tazon wey di oda king get? 32"If e si sey e nor go fit win, e go send mesenja wen di oda king stil dey far, go ask am haw dem go tak setol. 33"Laik dis tu, nobodi fit bi my disaipol if e nor komot en maind from evritin wey e get. 34"Salt gud, bot if e nor get taste, haw dem go fit mak am swit again? 35"Pipol nor go fit yuz am du enitin, na trowey dem go trowey am. Enibodi wey get ear, mak e hear wetin I dey tok!"


Copyrighted Material
Learn More

will be added

X\