San Mateo 1

1Ji'i ni xrachrje'en Jesucristo, thi bachrjeninxin David ko Abraham. 2Abraham kjui ndudee Isaac, ko Isaac kjui ndudee Jacob, ko Jacob kjui ndudee Judá ko kain xan choo Judá. 3Judá kjui ndudee Fares ko Zara, ko janee na̱ kjui Tamar. Fares kjui ndudee Esrom, ko Esrom kjui ndudee Aram. 4Aram kjui ndudee Aminadab, ko Aminadab kjui ndudee Naasón, ko Naasón kjui ndudee Salmón. 5Salmón kjui ndudee Booz ko janee Booz kjui Rahab. Booz kjui ndudee Obed ko janee Obed kjui Rut. Obed kjui ndudee Isaí. 6Isaí kjui ndudee rey David, ko rey David kjui ndudee Salomón, ko janee Salomón kjui nchri beka'o Urías. 7Salomón kjui ndudee Roboam, ko Roboam kjui ndudee Abías, ko Abías kjui ndudee Asa. 8Asa kjui ndudee Josafat, ko Josafat kjui ndudee Joram, ko Joram kjui ndudee Uzías. 9Uzías kjui ndudee Jotam, ko Jotam kjui ndudee Acaz, ko Acaz kjui ndudee Ezequías. 10Ezequías kjui ndudee Manasés, ko Manasés kjui ndudee Amón, ko Amón kjui ndudee Josías. 11Josías kjui ndudee Jeconías ko kain xan choo Jeconías. Ko ngain ncha'on mee, chujni Babilonia sabikao kain chujni Israel ngain nunthe'e, xraa chujni dike'na na̱ ixin runche'e xree na̱. 12Kuthimejan Jeconías kjui ndudee Salatiel, ko Salatiel kjui ndudee Zorobabel. 13Zorobabel kjui ndudee Abiud, ko Abiud kjui ndudee Eliaquim, ko Eliaquim kjui ndudee Azor. 14Azor kjui ndudee Sadoc, ko Sadoc kjui ndudee Aquim, ko Aquim kjui ndudee Eliud. 15Eliud kjui ndudee Eleazar, ko Eleazar kjui ndudee Matán, ko Matán kjui ndudee Jacob. 16Jacob kjui ndudee José thi kjui xixi'i María. Ko María kjui janee Jesús, thi di'in Cristo. 17Binthechon thenoo nduda'a ko kuexinxin Abraham ko juinchekjexinxin rey David, kuthejan binthechon ithenoo nduda'a ko kuexinxin rey David ko juexinxin are chujni Babilonia sabikao chujni Israel inchin chujni dike'na na̱, ko binthechon inaa thenoo nduda'a ko kuexi'in are ni Israel sabikao na̱ na̱ nunthe Babilonia, ko juexinxin are kunkji'i Cristo. 18Ja'in ku'en are kunkji'i Jesucristo: María, janee Jesús, ukjuathexin José ixin rukuthe'e ngain. Aro xrabinthekao'a choo na̱ are María ubeyaa chjan ixin juachaxiin Espíritu Santo. 19Aro José, xixi'i María, kjui naa xii jian ngathexin kon Ndo Dio, ko je'e binao'a ixin ruge'e chijni ixin thi ku'en María ko je'e ibinao'a rugeka'o, mexinxin je'e xraxaon jimao rukinthu'e. 20Are José jixraxaon jañaa, naa angeel Ndo Dio juii ngathe kuthachriin are tajijua ko ángel mee ndachro: —José, ja'a thi bachrjeninxin chujnii David, xraon'a sayé'e María inchin chri'a, ixin chjan ruchunda juixin xan ngain Espíritu Santo. 21Je'e sinchekunkji'i naa xaxii, ko ja'a sinchegi'in xan JESÚS. Jañaa si'in xan ixin je'e xan tsjenga xan 'na kainxin thi jian'a nche'e chujnii xan. 22Kain ji'i bikuenxin thi dindachro Ndo Dio ngain chujni bagayée juajnee ndo thi ndachro: 23Naa xanchrii xru'in xii bejuaka'o seyaa xan chjan, ko are tsunkji'i chjan mee, si'in xan Emanuel, ko ji'i ruchro: Ndo Dio jii ngayaa ná. 24Are José xingame'e, je'e binche'e inchin kuetu'en angeel Ndo Dio ko bayée María inchin chri'i. 25Aro bejuakao'a María, binchekunkjija xe'en xan sa'o ko binchegi'in xan JESÚS.


Copyrighted Material
Learn More

will be added

X\