Mateo 1

1Itue kesuratan et pengkatan i Jesus Kristo. Ya in mawa' dut pengkatan i Surutan Dabid tagna'. Itueng Surutan Dabid mawa' gasiʼt pengkatan et upu'upuan i Abraham tagna' ti'. 2Si Abraham in ama' i Isaak, si Isaak gasi tu', ama' i Jakob. Si Juda beke' ketipusdan ye in, ama' dye si Jakob. 3Menge' yegang i Juda dut ki Tamar de Peres beke' si Sera. Si Peres tu', ama' i Esrom na ama' i Aram. 4Si Aram in, ama' i Aminadab. Si Aminadab gasi in, ama' i Naason na ama' i Salmon. 5Yegang i Salmon dut ki Rahab in, si Boas. Yegang gasi i Boas dut ki Rut, si Obed. Si Obed in, ama' i Jesse. 6Si Jesse in, ama' i surutan Dabid tagna' ti'. Yegang i surutan Dabid dut esawa i Urias nekeuna ti', si Solomon. 7Si surutan Solomon gasi in, ama' i Roboam na ama' i Abias. Si Abias tu', ama' i Asa. 8Si Asa in, ama' i Josapat na ama' i Joram. Si Joram tu', ama' i Osias. 9Itueng si Osias, ama' i Jotam na ama' i Akas. Si Akas tu', ama' i Esekias. 10Si Esekias in, ama' i Manases na ama' i Amon. Na si Amon tu', ama' i Josias. 11Si Jekonias beke' ketipusdan ye in, ama' dye si Josias. Atin masa lineges dye negpeubu' menge' tawʼt Judio dut bangsa et Babilonia. 12Pegketbes pegpeubu' dut bangsa et Babilonia, si Jekonias in, ama' i Salatiel na ama' i Sorobabel. 13Si Sorobabel tu', ama' i Abiud na ama' i Eliakim. Si Eliakim gasi in, ama' i Asor. 14Si Asor in, ama' i Sadok na ama' i Akim. Si Akim gasi tu', ama' i Eliud. 15Si Eliud tu', ama' i Eleasar. Si Eleasar gasi in, ama' i Matan na ama' i Jakob. 16Itueng si Jakob, ama' i Jose na esawa i Maria. Si Maria tu', indu' i Jesus na pegbetengan si Kristo, ingin bersen, ya in piniling surutan et Empu'. 17Angkansa, ginsan in sempulu' epat neglatun-latun pengkatan mewanan ki Abraham seked ki Surutan Dabid. Sempulu' epat neglatun gasi mawa' ki Dabid seked dut leges neng pegpeubu' et Babilonia. Indyari, sempulu' epat latun gasi mewanan eset pegpeubu' dut Babilonia seked ki Kristo. 18Kwantin neinabu pegkeganak ki Jesus Kristo. Na si Maria in, kenyeng indu' beke' si Jose tu', megtutunang ne, segwa', mura dye nebulun, si Maria in megebteng ne sabab et kewasa et Empung Nakem. 19Si Jose tu', tunang i Maria, metigna'. Angkansa, pikir ye na tagu' yeng butasan ya, sabab mendi' ye ipeleew si Maria. 20Sasat pegpipikiren i Jose itue, maya dereakan et Empu' neperenta kenye set seled teginep, kwan, “Jose, keupu'upuan i Surutan Dabid, kas takut peburui' na pebulun ki Maria sabab ya pegmengirem sabab et Nakem et Empu'. 21Indyari, megyegang ya et sembatung lelaki beke' itue pengeranan muʼt si Jesus, sabab ya in mememawi' et kedusaan et menge' taaw na nemegkesala'.” 22Ginsan itue neinabu apang metuman pegsugiran et Empu' tagna' ti' pebiya' et tarus ye neng si Isaias, kwan, 23“Megmengirem itueng sembatung budyang, pegketbes megyegang et sembatung lelaki. Indyari, ngeranaʼt Imanuel, gay bersen eset sinalin, ‘Iba tyu Empu'.’ ” 24Pegka' neketiyag ne si Jose, inandel ye tahag et dereakan et Empu'. Indyari, megbulun dye ne de Maria. 25Temed kaya inulid i Jose si Maria seked nengganak itue et sembatung memulek na lelaki, pinengeranan yeʼt Jesus.


Copyrighted Material
Learn More

will be added

X\