COLOSENSES 1

1Ri Pab’lo, apostol rech ri Kristo Jesus, rumal ri urayib’al ri Dyos e ri Timote’o ri achalaxik, 2chkech ri etyoxlaj taq winaq rech ri Kolosa, che e’utzalaj taq achalaxik pa ri Kristo. Chiwech ri ix ri sipanik e ri utzil pa ri ub’i’ ri Dyos Qatatxel. 3Sib’alaj qamaltyoxij chech ri Dyos, ri Tatxel rech ri Qajawxel Jesukristo, aretaq chi’ kujchoman piwi’ pa ri qach’awem ruk’ ri Dyos, 4chi are taq chi’ ri uj xqata utzijol ri ikojonik chech ri Kristo Jesus e ri loq’oq’eb’al ik’u’x chkech konojel ri etyoxlaj taq winaq, 5rumal rech, che ri ix k’o ri iweye’b’al chila’ chikaj. E chrech we eye’b’al ri’, ri ix xixtijoxik rumal ri utzij ri saqalaj tzij, che are ri Utzalaj Tzij, 6che xopan iwuk’ ri ix; e jeri’ jas pa ronojel ri uwachulew, kuya’ uwach e kk’iyik, xoquje’ jeri’ pa ri itinimit, chi pa ri q’ij, aretaq chi’ ri ix xiweta’maj e xich’ob’ uwach ri usipanik ri Dyos pa ri saqalaj utzij. 7Ri Epafras, che kchakun quk’ ri uj, are xk’utuw weri’ chiwach, ri are’ che are nuk’exwach ri in; utzalaj ajchak rech ri Kristo, 8are ri are’ ri xb’in chqech ri loq’oq’eb’al ik’u’x ix pa ri Uxlab’axel. 9Rumal k’u wa’ weri’, xoquje’ ri uj, tza pa ri q’ij aretaq chi’ xqata utzijol weri’, sib’alaj kujch’aw ruk’ ri Dyos piwi’ e kqata chrech ri Dyos arech kuya’ chiwech ri ix ri utzalaj no’jb’al rech ri urayib’al ri are’, e ronojel uno’jib’al e retamb’al ri Uxlab’xel. 10E ruk’ wa’ weri’, ri ix, kixkowin wa’ che k’o jun utzalaj ik’aslemal chuwach ri Ajawxel e sib’alaj ix utz ri’ chuwach ri Are’ pa ronojel jas uwach: ri ix sib’alaj kiwachij utzalaj taq jastaq ri’ chuwach ri are’ e kixk’iy na’ ri’ pa ri uno’jib’al ri Dyos. 11Chiya’a’ b’a’ ichuq’ab’ pa ri uchuq’ab’ uq’ijil Are’, arech qas kixkoch’onik pa ri k’ax e qas kich’ijej ruk’ ki’kotemal; 12arech kixmaltyoxin na ri’ chrech ri Tatxel che xixub’ano arech qas k’o iwech kuk’ ri etyoxlaj taq winaq pa ri saqil. 13Are ri are’ xujb’oqowik pa ri rajawib’al ri q’equ’mal e xujuk’am uloq pa ri Rajawib’al ri loq’alaj Uk’ojolxel, 14che pa ri are’ k’o wi ri qakolotajem e ri sachib’al qamak. 15Ri are’, are uwachib’al ri Dyos che man kujkowin taj kqil uwach, ri are’ xalax nab’e chuwach ronojel ri uwachulew, 16rumal rech, che pa ri Are’ xb’an ronojel ri jastaq uwach, pa ri kaj e pa ri uwachulew, ri jastaq uwach che kqilo e ri jastaq uwach che man kqil taj, ri nimalaj taq t’uyb’al, ri nimalaj taq ajawib’al, ri nimalaj taq kowinem ronojel xb’antajik rumal ri are’ e chi rech wi ri are’ ronojel. 17Ri are’, chi are nab’e k’o uloq chuwach ronojel e ronojel jastaq k’o pa ri are’. 18K’atek’uri’, ri are’, xoquje’ are ujolom ri ub’aqilal che are ri Komon Tyox. Ri are’, are nimalaj ub’antajik, ri are’ che xa’lax nab’e chkixo’l ri ekaminaqib’ rajawaxik, che ri are’ are nab’e pa ronojel jastaq uwach, 19rumal rech, che are utz che ri urayib’al ri Dyos xub’ano pa ri are’, che ronojel utzil kkanaj kan pa ri are’. 20K’atek’uri’, rumal ri are’, ronojel winaq xub’an suk’ chuwach ri are’, cho ri uwachulew e xoquje’ cho ri kaj aretaq chi’ xuja’marisaj ronojel rumal ri ukik’el cho ri ripib’al. 21Xoquje’ ri ix, che ojer kanoq ix kaxlan taq winaq e ixk’ulel, rumal ri itzel taq ichomanik e ri itzel taq ichak, 22ukamik ri’, xixusuk’ub’a pa ri ub’aqil aretaq chi’ xuya’ pa ri kamikal, arech ri ix, chuwach ri are’ ixtyoxlaj taq winaq, man k’o ta xoq’o’linaq iwach e man k’o ta jun jas uwach itzel. 23Xuwi rajawaxik, che ri ix kixkanaj kan pa ri kojonik, qas k’o ichuq’ab’ pa ri saqalaj tzij; e man kiya ta kan ri nimalaj iweye’b’al ri xich’ob’ uwach rumal ri Utzalaj Tzij che xitatab’ej ix, che xya’ ub’ixik chkech konojel winaq chi chuxe’ ri kaj; e ri in che in Pab’lo xinuxik in ajchak chrech. 24Kamik ri’, sib’alaj kinki’kotik rumal taq ri k’ax che kinch’ijej in rumal utoq’ob’isaxik iwach ri ix, e ri in kintz’aqatisaj ukojik pa ri nub’aqil ri jetaq k’ax che kraj na pa taq ri uk’axk’olil ri Kristo rech ri toq’ob’isab’al uwach ri ub’aqil Are’, che are ri Komon Tyox, 25e chrech we Komon Tyox ri’, ri in in rajchak, chi jeri’ jacha ri taqanik xuya’ ri Dyos chwech, arech wumal ri in, kb’antaj pa ri itinimit ix ri Upetb’al ri Utzij ri Dyos, 26ri awatalik uwach chub’eq’ij chub’esaq uloq e pa k’i mayilq’ijsaq e kamik ri’ kuq’alajisaj rib’ chkiwach ri etyoxlaj taq uwinaq. 27Ri Dyos, xraj che keta’max uwach ri Uq’ij ri uq’inomal we awatalik ri’ pa taq ri kitinimit ri e’are’ chen man k’o ta ri qakojonik kuk’, che are ri Kristo chixo’l ri ix, ri are’ che are reye’b’al ri Q’ijil. 28We Kristo ri’, kqaya’ ub’ixik ri are’ kuk’ konojel winaq e ruk’ ronojel no’jb’al kqak’utu’ chkiwach konojel winaq, arech, chi konojel e’utz chuwach ri Kristo. 29Rumal k’u wa’, chi pa ri utoq’ob’ wa’ weri’, ri in kinkosik chi ruk’ ri uchuq’ab’ ri Kristo che xas kchakun wi wuk’ ri in.


Copyrighted Material
Learn More

will be added

X\