FILIPENSES 3

1K’atek’uri’, e’achalaxik; chixki’kot b’a’ pa ri Ajawxel… Aretaq chi’ ri in kinya ub’ixik weri’ chiwech man kq’axow ta chwech ri in, xoquje’ jun suk’ab’anik chiwech ri ix: 2¡Chichajij iwib’ chkiwach ri etz’i taq winaq! ¡Chichajij iwib’ chkiwach ri e’itzel taq ajchakib’! ¡Chichajij iwib’ chkiwach ri ewinaq che man qas ta tzij pusim uwi’ kikowil! 3Rumal rech, che ri uj qastzij pusim uwi ri qakowil, ri uj che kqaya ri qas toq’ob’ je’ jas ri ruxlab’al ri Dyos, e che k’o qaq’ijil pa ri Kristo Jesus e che man ku’l ta qak’u’x chrij ri qab’aqil. 4Pune’tane, ri in kinkowinik kinjikib’a’ ri nuk’ux chrij ri nub’aqil; ¡we k’o jun chik kuchomaj che kkowinik kujikib’a’ uk’u’x chrij ri ub’aqil, ri in sib’alaj nim kinkowin chi na chuwach ri are’! 5Ri in pusim uwi ri nukowil chi pa ri uwajxaq nuq’ij; in rija’l ri Isra’el, in rech ri ujuq’at ri B’enjamin, in ajheb’re’o e in uk’ojol jun ajheb’re’o; in farise’o chuwach ri Pixab’, 6xinachixnik chkech ri e’ajkristo e xe’inwoqataj; pa ri usuk’il ri Pixab’, ri in, in utzalaj winaq. 7K’atek’ut ronojel ri utz taq jastaq wech ri in, ri in kinwilo che chuwach ri Kristo, weri’ man utz taj. 8K’atek’uri’ kamik ri’, ri in, ronojel itzel kinwilo chuwach ri nimalaj taq jastaq che xinweta’maj chrij ri Jesus Kristo ri Wajawaxel. Rumal ri are’ ri in kink’amowaj che ri in ronojel xintzaqo e ronojel xa jun mes chnuwach ri in, arech ri in kinch’ak ri Kristo. 9E arech ri in kinriqitaj pa ri are’ man ruk’ ta ri nusuk’il ri in, che jun suk’il che petinaq pa ri Pixab’, xane pa ri suk’il che kpe pa ri kojonik chrech ri Kristo, pa ri suk’il che kpe ruk’ ri Dyos e che toq’em rumal ri kojonik, 10arech ri in kinweta’maj uwach ri are’ ruk’ ri uchuq’ab’ ri uk’astajib’al uwach e ruk’ ri riqoj ib’ ruk’ taq ri uk’axk’ol ri are’, arech ri in, in jeri’ pa ri ukamikal jacha’ ri are’, 11arech ri in kya’taj chwech kk’astaj nuwach chkixo’l ri ekaminaqib’. 12Ri in, maja’ kinopan pa ri uk’isb’alil e maja’ kinriqa’ che in tz’aqatalaj winaq; xane ri in kintij anim arech ri in kinriqa’, je’ jas uriqik xub’an ri Kristo Jesus. 13E’achalaxik, ri in man kinchomaj taj che xriqitajik wumal in, xane xuwi kinb’ij weri’: Ri in man kinchomaj ta chik ri b’e che xb’antaj wumal ri xkanaj kanoq chwij, xane are kinchomaj e kinkoj nuchuq’ab’ chech ri k’o chnuwach. Ri in kinb’e ruk’ ronojel wuxlab’al, 14e ri in kintij anim arech kinopan pa ri uk’isb’alil, arech k’o ri tojb’al uk’axel chwech ri kujusik’ij wi ri Dyos chikaj pa ri Kristo Jesus, arech ri uj kqak’amo. 15Ri uj, che ri uj utzalaj taq winaq, rajawaxik che jeri’ kujchomanik; k’atek’uri’, we k’o nik’aj jastaq chik kichomaj ri ix, are ri Dyos ri’ kya’ow na ri usaqil chiwech. 16K’atek’uri’, kamik ri’ pa ronojel ri ujopaninaq wi, jo’ b’a’ pa we b’e ri’. 17E’achalaxik, chib’ana’ ix jeri’ jacha’ ri in, qas utz kilik chib’ana’ ri e’are’, ri k’o jun kik’aslemal che jeri’ jacha’ ri jun k’amb’al no’j kik’amom quk’ ri uj. 18Rumal rech, che ek’o sib’alaj winaq eje’ jas e’uk’ulel ri uripib’al ri Kristo, jacha’ sib’alaj nub’im chik chiwech e kinb’ij chi jumul chiwech kamik ri’ ruk’ uwa’l taq nuwach. 19Pa ri uk’isb’al kech ri e’are’ kkiriq na ri sachib’al ib’; ri e’are’ are kidyos ri kipam e are nim kkil wi ri kikowil ri achijab’; xuwi utz chkiwach ri jastaq uwach che rech we uwachulew ri’. 20K’atek’uri’ ri uj, ujuwinaqil ri kaj, e sib’alaj qeye’m ri qakolonem pa ri Ajawxel Jesus Kristo che k’o chila’ chikaj; 21ri Are’ che kuya na ri’ ri uq’ijil we jun mesalaj qab’aqil ri’ jacha ri uq’ijil ri ub’aqil ri are’; kkowin ri’ che uya’ik ruk’ ri uchuq’ab’ ri are’ k’olik, che kkowinik kuya chuxe’ raqan ronojel jas uwach.


Copyrighted Material
Learn More

will be added

X\