MATEO 6

1Dios rimashcata ama ruranquichichu runacuna ricuncapaclla. Chashna racpi, cancunapac jahua pachapi tiyac Yaya mana imata cuyanca. 2Can imatapash cushpa shucta yanapancapac, ama caparichu nishpa: "Ñuca rashcata ricuichic"; chashna ranacun llullacamacuna tantarina huasicunapi, callecunapipash, runacunapacpi yupachai tucuncapac. Shuti cancunata nini: Cuyanata ña chasquinurca. 3Can, ranti, imatapash shucta yanapancapac cucpi, manapi can rashcata yachachun; 4can alli rashca pacalla saquirichun; canpac pacallapi ricuc Yaya canta cuyanca. 5Cancuna Dios—huan rimarishpa, ama llullacamacuna shina raichichu. Paicuna shayarishpa, tucuicunapac ñaupacpi, tantarina huasicunapi, callecunapi Dios-huan rimac canacun, runacuna paicunata ricuncapac. Shuti cancunata nini: Cuyanata ña chasquinurca. 6Can Dios-huan rimarishpa, huasi ucuman yaicunqui: puncuta huichcashpa, pacallapi tiyac canpac Yaya Dios—huan rimanqui. Pacallapi ricuc canpac Yaya Dios canta cuyancami. 7Can Dios—huan rimarishpa, ama achca shimicunata rimanquichu; Diosta mana ricsiccuna achca yanca shimicunata rimanun "Dios uyahuancami" nishpa yuyarishpa. 8Ama paicuna shina ruraichichu; Dios cancuna mutsushcata yachanmi, cancuna chaira mana mañacpi. 9- 13Chairaicu cashna rimanquichic: Ñucanchic jahua pachapi tiyac Yaya, tucuicuna canta ricsinuchun. Can Apu tucuncapac shamui. Canpac munai rurarichun cai allpapi jahua pachapi rurarishca shina. Ñucanchic mutsushca tantata cunan puncha ñucanchicman cui. Ñucanchic manalli rashcata perdonapai, ñucanchicpash shuccuna ñucanchicman manalli rashcata perdonanchic. Juchanayaipi urmancapac ñucanchicta ama saquichu; manallimanta ñucanchicta quishpichi. 14Cancuna perdonacpi shuccuna cancunaman manalli rashcata, jahua pachapi tiyac Yayapash cancunata perdonanca; 15ranti, cancuna shuccunata mana perdonacpi, cancunapac Yaya mana perdonancachu cancunapac juchacunata. 16Cancuna sasina puncha, ama llullacamacuna shina raichichu; paicuna llaquirishcalla purinun, runacunaman paicuna sasirashcata ricuchincapac. Shuti cancunata nini: Cuyanata ña chasquinurca. 17Can sasicushpa, canpac ñahuita maillanqui, asnac yacuhuan canpac acchata armarinqui, 18can sasirashcata shuccuna ama yachancapac; pacalli tiyac canpac Yaya Dios yachancami, canta cuyancami. 19Ama cai pacha imacunata tantachichichu; cai pachapi susu micun, tucui huacllirin; shuhuacuna huasipi yaicunun shuhuancapac. 20Ashtahuan alli canca jahua pacha imacunata tantachina; chaipi susu mana micunchu: manaima huacllirin; mana shuhuanun. 21Canpac imacuna tiyashcapi, chaillapita canpac yuyai tiyanca. 22Canpac ñahuicuna achic shinami canpac aichapac; canpac ñahuicuna alli cacpi, tucui aicha punchayanca; 23canpac ñahuicuna manalli cacpi, tucui aicha tutapi tiyanca. Can charishca achic tuta capi, ¿ima sami yana chai tuta canca? 24Shuc runa ishcai patronta sirbina mana ushanchu; shucta llaquishpa, shucta chicninca; shucta uyashpa, shucta mana uyancachu. Diosta cullquitapash sirbinata mana ushanquichichu. 25Chairaicu cancunata nini: Ama llaquirichichu "causancapac imata micushun, imata churarishun" nishpa. ¿Manachu causana micunamanta yalli balin? ¿Manachu aicha churanamanta yalli balin? 26Pishcucunata ricuichic. Mana tarpunun, mana pallanun huasipi huacaichincapac; chashnapash, jahua pachapi tiyac Yaya paicunata caran. ¿Manachu cancuna pishcucunamanta yalli balinquichic? 27¿Cancunamanta maican, imatapash rashpa, causaita unayachinca? 28¿Churanamanta imaraicu llaquirinquichic? Sacha sisacunata ricuichic; mana llancanucpipash, mana ahuanucpipash, sumac huiñanun. 29Shuti cancunata nini: Salomonpash, tucui laya churanacunata charishpa, mana sisacuna shina churaricchu carca. 30Dios, mana unaichu causac sacha sisacunata chashna churachicpi, ¿manachu ashtahuan allita cancunahuan ruranca, ansalla inic runacuna? 31Chairaicu, ama llaquirichicu: Imata micushun, imata upiashun, imata churarishun nishpa. 32Diosta mana ricsiccuna chaicunamanta llaquirinun; cancunapac jahua pachapi tiyac Yaya Dios cancuna chai tucui mutsushcata yachanmi. 33Chashna cacpi, ñaupacta Diosta mascaichic, pai rimashcata raichic; causancapac mutsushca mana pishiyancachu. 34Caya punchatapash ama yuyaranquichichu; caya punchapash quiquin llaquicunata apamunca. Caran punchapac llaquicunahuan pacta can.


Copyrighted Material
Learn More

will be added

X\