Matius 1

1(1, 17) Entom deh gesah iné’-ake’, gesah pureh-jalor Yesus Kristus yang moni’ naparaná’ ka dania ento dai katurun Ke’ Daut, raja onyá Israel. Yesus Kristus nyéném Tukang Salamát yang jananyi lai Allah sae’seh. Tingkat pureh-jalor Yesus nyén toruh. Tingkat yang kamaro’ batingai dai Ke’ Abraham sampai ka Ke’ Daut. Jadi dai Ke’ Abraham ka Ke’ Raja Daut nyén ampat belas katurun yang tanulis ko ngoto. Dah nyén ge’ tingkat yang panganukahneh batingai dai Ke’ Daut sampai ka onyá Israel koná kukot ka dangeri Babel sae’seh pun ampat belas katurun yang nitong ko. Tingkat yang pangabisneh batingai dai onyá Israel koná kukot sae’seh, sampai ka Yesus Kristus naparaná’ di dania, ampat belas katurun ga’am. 2(2-6a) Jadi tingkat purehNeh yang kamaro’ peto: Ake’ dop Abraham sae’seh baraná’ ka Isak. Isak baraná’ ka Yakup. Yakup baraná’ ka Yehuda dien baraposi’. Yehuda baraná’ ka Peres doduh Serah. Peres doduh nyén oná’ Tamar sae’seh. Jadi Peres nyén baraná’ ka Hesron, Hesron baraná’ ka Ram, Ram baraná’ ka Aminadap, Aminadap baraná’ ka Nahason, Nahason baraná’ ka Salmon, Salmon baraná’ ka Boas. Boas nyén oná’ Rahap sae’seh. Boas nyén baraná’ ka Obet, oná’ Rut. Obet baraná’ ka Isai. Yang pangabisneh Isai nyén baraná’ ka ake’ dop Raja Daut. Jadi samuyá’neh tingkat yang kamaro’ yang nitong ko ngoto ampat belas katurun. (6b-11) Dah moni’ ka tingkat yang panganukahneh ge’ batingaineh dai ake’ dop Raja Daut nyén sampai ka onyá Israel koná kukot ka dangeri Babel. Jadi Daut nyén baraná’ ka Salomo. Ino’ Salomo nyén Batseba, yang kola manyadi osau Uria sae’seh. Lopas nyén Salomo baraná’ ka Rehabeam, Rehabeam baraná’ ka Abia. Abia baraná’ ka Asa, Asa baraná’ ka Yosapat. Yosapat baraná’ ka Yoram. Yoram baraná’ ka Usia. Usia baraná’ ka Yotam. Yotam baraná’ ka Ahas. Ahas baraná’ ka Hiskia. Hiskia baraná’ ka Manase. Manase baraná’ ka Amon. Amon baraná’ ka Yosia. Yosia nyén sae’seh baraná’ ka Yekonya dien baraposi’. Pas ka jamán ake’ dop Yekonya nyéném onyá Israel koná kukot, lalu encang ka dangeri Babel sae’seh. 12Jadi moni’ ka tingkat yang pangabisneh, batingai dai ake’ dop Yekonya sampai ka pamoni’ Yesus Kristus ka dania ento. Jadi di tingkat yang pangabis nyén pada’ ake’-ake’ Yesus yang dah koná kukot nyénseh, ngáúm yang mori ge’ ka dangeri Israel sae’seh, peto katurunneh: Yekonya baraná’ ka Sialtiel. Sialtiel baraná’ ka Serubabel. Serubabel baraná’ ka Abihut. Abihut baraná’ ka Elyakim. Elyakim terus ge’ baraná’ ka Asor. Asor baraná’ ka Sadok. Sadok baraná’ ka Akim. Akim baraná’ ka Eliut. Eliut baraná’ ka Eliasar. Eliasar baraná’ ka Matan. Matan baraná’ ka Yakup. Yakup baraná’ ka Yusup. Yusup nyén yang móyá’ Maria ná’ osauneh. Maria nyéném yang baraná’ ka Yesus Kristus, Tukang Salamát yang jananyi lai Allah sae’seh. Jadi oko ngitong ampat belas katurun ga’am tingkat yang pangabis nyén. Jadi nyéném gesah pureh-jalor Yesus yang ngayó’ Io seja omát katurun dai ake’ dop Abraham aba Ake’ Daut, raja onyá Israel sae’seh. 18Jadi ento gesah Yesus Kristus moni’, naparaná’ ka dania ento: Odeh siko’ onyá dari yang baodan Yusup. Io dah batunáng ba siko’ onyá dara yang baodan Maria. Ja’neh ogon kola doduh rakat baboh. Samari jong nyén Maria taka biti nám. Ja’neh biti nyén maineh biti entam lai onyá dari. Io biti nyén pongán yang eran, entam lai kuasa Roh Allah yang nyurohneh tajadi. 19Yusup nyén onyá yang bujor-benar jai Allah. Mangka, seta dah ngoping gesah Maria biti, io pun miker ná’ nula’-nangoun Maria. Ja’neh nula’neh pun ná’ cara ngojap-ngojap nám gola’ nganyakat odanneh di adap onyá bokah. 20Ja’neh seta dah Yusup nangkoi rancana nyén, lalu io pun tapabiis. Katengáh Yusup biis pecen, taka bapumú. Odeh siko’ malekat Tuhan moni’ ka io. Jai malekat nyén ngomóng ka Yusup, “O Yusup, katurun Raja Daut. Maim gola’ omó móyá’ Maria ná’ mó jodo. Palajum rancana kanuh ná’ sabat. Entam Maria biti ento maineh entam onyá dari lain. Ja’neh io biti entam lai kuasa Roh Allah saniri,” jai malekat nyén. 21Lopas nyén malekat ge’ terus ngomóng ka Yusup, “Tentang oná’ yang odeh dalam tonineh dari. Kalo’ io dah baraná’ paji, omó sa’ ngaodanneh Yesus. Odan Yesus nyén pas cucok ka tuju gawaiNeh moni’ ka dania ento. Entam tuju Io moni’ ná’ nyalamát onyá bokah yang cagar manyadi empo Allah; ge’ dená’ mai buleh ukum yang jatah dosa-kajakatneh,” jai malekat nyén. Seta dah santo’ malekat ngomóng iu nyén, io pun tamonáh maronti’ arong nyén. 22Jadi omátám. Samuyá’ pongán nyén pun tajadi pas empah nyén ná’ nuntong omóng Allah yang dah tanulis lai ake’ dop Yesaya sae’seh. Kená’ pun tao’ ka idoh siko’ tukang monang-maragah omóng Allah ka odop. Jadi idoh nulisneh sae’seh peto: 23Seja omát odeh siko’ onyá dara bungas cagar ná’ biti, lalu baraná’ ka siko’ oná’neh yang dari. Onyá bokah cagar nyebut odan oná’neh nyén Imanuel. Pecen jai ake’ dop nulis omóng Allah nyén sae’seh. Odan Imanuel nyén retineh Allah sararat odeh basamáh-samáh aba mansia di dania ento. 24Jadi mori ka gesahneh nyén, lopas nyén Yusup pun takojot biis. Io miker ka pumú nyén, lalu io mai gama’ ge’. Io seja omát ngalaku samuyá’ pongán yang tonang lai malekat Tuhan ka io. Io ngalaju móyá’ Maria ná’neh jodo. 25Seta dah doduh sabat, Yusup mincang Maria ka rumáhneh. Ja’neh salamá io ge’ biti ka oná’neh nyén, doduh mai bajorah biis. Pas moni’ ka desneh Maria pun seja omát baraná’ám ka siko’ oná’ dari. Lalu Yusup ngaodanneh Yesus pas empah odan yang tonang malekat ka io dalam pumúneh misseh.


Copyrighted Material
Learn More

will be added

X\