Matius 1

1Kristus Yesus, Zen teipsïn zini Daud Bak mo Auyan-tane. Zëno auyan-aza mo ausuna, zen Abraham Bak onakon de aïtbinkim kon gwesibir hanankam: 2Abraham Isaksa wë taka. Isak hwëna Yakobsa wë taka. Zen hwëna beyana dua-blas enkam wei-wik gulku. Ahana bosena Yehuda, 3zen hwëna Peres ne Zera neka wë soka– wenya bosena Tamar hon. Hwëna Peres zep Hezronsa wë taka. Zen hwëna Ramsa wë taka. 4Ram hwëna Aminadabsa wë taka. Zen hwëna Nahasonsa wë taka. Zen hwëna Salmonsa wë taka. 5Salmon hwëna Boassa wë taka– Rahab hon. Boas hwëna Obedsa wë taka– Rut hon. Zen hwëna Isaesa wë taka. 6Isai hwëna teipsïn zini Daud Baksa wë taka. Teipsïn zini Daud Bak onakon hëndep in kim Israel mo auyan-azasa Babel san dep asaskam kap nulhak– zao de lowehe gwen hap, zëno mae mo bosem-sesa de aïtbinni an zen: Daud Salomosa wë taka– Uria mo we nala Batsyeba hon. 7Salomo hwëna Rehabeyamsa wë taka. Zen hwëna Abiasa wë taka. Abia hwëna Asa Baksa wë taka. 8Zen hwëna Yosafatsa wë taka. Hwëna Yosafat Yoramsa wë taka. Zen hwëna Uzia Baksa wë taka. 9Uzia hwëna Yotamsa wë taka. Zen hwëna Ahas Baksa wë taka. Ahas hwëna Hiskiasa wë taka. 10Zen hwëna Manasyesa wë taka. Manasye hwëna Amon Baksa wë taka. Zen hwëna Yosia Baksa wë taka. 11Yosia hwëna nonol Yekonyasa wë taka. Zao zep hen etan oso wal zemka wei-wik gulku. Israelk de zini kim holokam Alapsa hli dak, dekam zep Babelk de jana nabare zini teipsïn zini Yekonyasa zëre mae mo lang san dep nërhak, hen Israelk de zini beya tangankam asaskam zao kang nuk. 12Yekonya hwëna Babelk zep Sealtielsa wë taka. Zao kim 70 tahun enkam lowehek, ki zep etan tapbla nuk. Sealtiel hwëna Zerubabelsa zep wë taka. 13Zerubabel hwëna Abihudsu zep wë taka. Zen hwëna Elyakimsi zep wë taka. Elyakim hwëna Azor Baksa zep wë taka. 14Zen hwëna Zadoksa zep wë taka. Zadok hwëna Akimsi zep wë taka. Zen hwëna Eliudsu zep wë taka. 15Eliud hwëna Eleazarsa zep wë taka. Zen hwëna Matansa zep wë taka. Matan hwëna aha zini Yakobsa zep wë taka. 16Yakob hwëna Maria mo zini Yusupsu zep wë taka. Maria zep Yesussu wë tak– Insa “Kristus”kum en gweblananke. 17Zep Abraham onakon de auyan-azasa aïtbir hankam Daud osan dep beyana kïtak empat-blas enkam. Hen Daud onakon de aïtbir hankam Israelsa de asaskam Babelk kang gun sun dep, beyana hen empat-blas enkam. Hen dekon de etan lwan dahal zannak Kristus Yesussu de jaha gwen san dep aïtbir hankam, beyana hen empat-blas enkam. 18Kristus Yesussu de jaha gwenna in, zen ausuna a kirekam mo lwakye: An zem in Maria, zen Yusup hup de golgu gweblanna. Hwëna nama de gon srëmnak zep u gwek. Hwëna Yusup hom anakan tame gu'unka, “Zen Alap mo Enho mo sosonkam u gwe'an.” 19Yusup man tangan Musa mo tïtï tabin ola blikip gwesïk gwibirki, zep Mariasa zë-en enlala gwibi'inka, “Ëe molyë gok, sap zen malinkim u gwe'an.” Zen dekam zep enlala gwe'anka, “Damnak de kira gwenkam, ki Maria mo bosena sa karek gwer. Zep sowëkam asa gubir, ‘Ëe ama emsa baes gwibi'in.’” 20Zen kim dam gulsuku, “Asa ki Mariasa baes gwibir,” hwëna dekam zep ni tannak eisirkim Alap mo dam taha nakore zini gublu zaka, “Yusup, Daud Bak mo auyan-tane, bahem Mariasa de gon hap baes gwen. Sap Walasna insa u gwe'an, Zen Alap mo Enho mo sosonkam dena. 21Zen zi walassa sa jaha gwer. Em Yesuskum bose ta, sap Zen in Zen sa zëre mo hlï irin zini ngaya tabiri– zëno mae mo karek-kareksa de ngan gulsuzimdinkim.” 22An kïtak Alap Zën ki syal gwibirki– zëre mo ol ayang gul gwen zini Yesaya mo alenak dikim zaun hup, mensa Zëna anakan gu-gublukake, 23“Zi niban de gaïng ën srëm wenam seiwiri sa u gwer, hëndep zi walassa sa jaha gwer. Walasna in ‘Imanuel’kam sa bose dal.” Yesaya insa “Imanuel”kam gubluka, zen Ibrani olkam. Zëno enlalana, “Alap Zën nësa golëlowehe gwe'ara.” 24Ni tan nakon kim luweka, hëndep in kirekam Alap mo dam taha nakore zini in tonblaka, desan zep ki hëndep ang gweka. Hwëna Maria kim jaha gwe srëm gwe'ak, zen hom dekam nini apdekam la'ak. Walasna insa kim jaha gwek, Yusup dekam zep “Yesus”kum bose taka.


Copyrighted Material
Learn More

will be added

X\