MATYU 1

1Di'oraz kuwai ida'a kakuwaapa-karu Jesus Christ dokozu-daunnao sakadinan iki'o dau'ana'o. Jesus Christ, uruu King David takaan-daun, na'iki David, uruu Abraham takaan-daun.

2Di'i naa ĩ'uu kida sakadinanu'u Abraham di'iki'o atii King David ida'ati: Abraham dani uu Isaac; Isaac dani uu Jacob; Jacob dani uu Judah na'iki kaina'a ba'oran u'inawuzunao; 3Judah dainao uu Perez na'iki Zerah (ĩdaro uu Tamar); Perez dani uu Hezron; Hezron dani uu Ram; 4Ram dani uu Amminadab; Amminadab dani uu Nahshon; Nahshon dani uu Salmon; 5Salmon dani uu Boaz (Boaz daro uu Rahab); Boaz dani uu Obed (Obed daro uu Ruth); Obed dani uu Jesse; 6Jesse dani uu King David.

7Solomon dani uu Rehoboam; Rehoboam dani uu Abijah; Abijah dani uu Asa; 8Asa dani uu Jehoshaphat; Jehoshaphat dani uu Jehoram; Jehoram dani uu Uzziah; 9Uzziah dani uu Jotham; Jotham dani uu Ahaz; Ahaz dani uu Hezekiah; 10Hezekiah dani uu Manasseh; Manasseh dani uu Amon; Amon dani uu Josiah; 11Josiah dani uu Jehoiachin na'iki kaina'a ba'oran u'inawuzunao.

12Aizii patarubanao na'akan dauna'ana'o Israelitenao Babylon iti atii Jesus Christ ida'ati'i dau'ana'o: Jehoiachin dani uu Shealtiel; Shealtiel dani uu Zerubbabel; 13Zerubbabel dani uu Abiud; Abiud dani uu Eliakim; Eliakim dani uu Azor; 14Azor dani uu Zadok; Zadok dani uu Achim; Achim dani uu Eliud; 15Eliud dani uu Eleazar; Eleazar dani uu Matthan; Matthan dani uu Jacob; 16Jacob dani uu Joseph, uruu Mary daiaruz; Mary dani uu Jesus, Jesus uruu wuru'u dakota-kariwaiz Christ nii. 17Ukau'an 14 ĩtonazinaa aitinpan Abraham di'iki'o atii David ida'ati. Na'apa uaitinpan iriban koshan 14 David di'iki'o atii ĩtarubanao na'akan dono'o ida'ati'i ĩdyaun Babylon iti; na'iki na'apa uaitinpan ĩiriban koshan ĩtarubanao na'akan dauna'an ĩdyaun Babylon iti atii Christ ida'ati.

18Kaikapa'o da'i Jesus Christ shakatauzonu'u. Jesus daro Mary, Joseph taapani'i naa pazaamatan ni'o paudaiaro nii. Mazan ĩzaamataakan ua'ii, Mary kaudanin naa. Wuru'u okaudaninuz Kaimana'o Doronaa ida'ana'o. 19Aizii Joseph kaimana'o pidan uruu, ukau'an aonaa uba'azootin-kida'azon Mary iriba'o pidan bii ii, udi'itinpan pa'ida'a sodi na'apam nii pamarina'atan pamazida'azon otuma.

20Joseph da'awu'ukan padi'itinpan pu'u tuukii. Sariapa Tominkaru di'iki'o angel kaawan u'ida'ati uzanda'awun ii. Na'iki ukian u'ati, “Joseph, King David takaan-daun, aonaa putaria'ana'a pumazidan Mary tuma. Aonaa na'apa'oram ida'ana'o mani karikaonan wuru'u okaudaninuz, mazan Kaimana'o Doronaa ma'ozakan ida'ana'o wuru'u okaudaninuz. 21Okaudanipan an, daonaiora'o nii odani nii. Na'iki Jesus kii pa'i pudakota u'uu, usha'apanum kau'an ukazannaatan nii papidanannao ĩ'oian ai,” ukian u'ati.

22Aizii wuru'u na'apa'oraz sha'apan, Tominkaru Paradan mishiinan ukianuz paprophetin ida'an: 23“Kaina'a'o nii bauda'apa pa'ina'o zun, aona'o zii okiitauzo-kao kaudanin nii daonaiora idi. Uruu Immanuel kii-karu nii udau'an, watuma'o Tominkaru kia'o wuru'u kii-karuz.”

24Joseph pokoda'akan, sariapa umishidan Tominkaru di'iki'o angel paradan pa'ati. Uruu idi umazidan Mary tuma. 25Mazan aonaa na'apainim ukiaapauzon Mary, atii na'apa okaudanipan. Joseph ka'uutan naa wuru'u koraidaonaaz Jesus kii.


Copyrighted Material
Learn More

will be added

X\